အပိုင်း ( ရ ) နိဂုံးပိုင်း
ကျနော်တို့ တည်းခိုခွင့်ရတဲ့အခန်းမှနေပြီး အောက်ကိုငုံ့ ကြည့်ရင် ရေကူးကန်လေးကိုတွေ့ ရပါတယ်။ ရေကူးကန်လေးနဲ့ ကျနော်တို့ အဆောက်အဦးကြားမှာ ကွက်လပ်တခုရှိပါတယ်။ အဲဒီ ကွက်လပ်ကလေးထဲမှာ ထီးလေးတွေဖွင့်ပြီး စားပွဲဝိုင်းတချို့ ချထားတာ တွေ့ ရပါတယ်။ ဟော်တယ်ဝန်ထမ်းတွေ သွားလာနေကြတာ တွေ့ နေရပါတယ်။ ကျနော့် ကုတင်ဘေး လိုက်ကာကြီးကိုဖယ်ကြည့်ရင် ဒါတွေကို ရှင်းရှင်းလင်းလင်း တွေ့ နေရပါတယ်။ မှန်ကာကြီးဘေးနားရပ်ပြီး အောက်ကိုငုံ့ ကြည့်နေရင်းက ဒီကနေ့ ညစာစားပွဲကို အဲဒီကွက်လပ်ကလေးမှာ ပြင်ဆင်နေဟန်တူတယ်လို့ တွေးမိပါတယ်။
ကျနော်ကတော့ ညစာကို သိတ်ပြီးမစားချင်တော့ပါဘူး။ ဆာလည်းမဆာပါဘူး။ “ ညီလာခံပြီးရင် အချိန်ရရင် စာအုပ်ဆိုင်တွေ လုိက်ပို့ ပေးလို့ ရတယ်” ဆိုတဲ့ “ဆရာသာ” (မောင်သာမည) ရဲ့စကားကို လက်ခံချင်ပေမယ့် သူ့ ခမျာ တနေကုန် ညီလာခံထဲ ထိုင်ခဲ့ရပြီးပြီ။ ဒါကြောင့်မို့ “မသွားတော့ပါဘူ ကျေးဇူးတင်ပါတယ်ဆရာရယ်↔လို့ ပြောခဲ့ပါတယ်။ ဆရာသာ ဘယ်အချိန်ပြန်သွားတယ်ဆိုတာတောင် သတိမထားလိုက်မိပါဘူး။
ကိုယ့်အခန်းကို ပြန်ရောက်တော့ ၉၉ ခုနှစ်ထဲ ချင်းမိုင်မှာလုပ်တဲ့ စီမီနာတခုကိုလာခဲ့စဉ်တုန်းက စာရေးဆရာမလေး “မေငြိမ်း” က ကျနော့်ကို ဆိုင်တဆိုင်မှာ ထမင်းလိုက်ကျွေးခဲ့တာ သွားပြီး သတိရပါတယ်။ သူက ချင်းမိုင်မှာနေတဲ့သူ။ ကျနော်တို့ မောင်နှစ်မနှစ်ယောက်( ဟဲ ဟဲ သူနဲ့ ကျနော် တွဲရိုက်ထားတဲ့ ဓါတ်ပုံထဲကအတိုင်းဆိုရင် သူနဲ့ ကျနော် တူဝရီးလောက် အသက်ကွာကြတယ်ဆိုတာပြောရင် ဘယ်သူမှယုံကြမှာမဟုတ်လို အားလုံးနဲ့ သဘောထားမကွဲရလေအောင်မောင်နှစ်မ ဆိုတဲ့စကားလုံး သုံးလိုက်တာပါ။ ဆရာမလေး သဘောတူပါစ။ ) ဒီတုန်းက ညနေပိုင်းကြတော့ ဆရာသာရဲ့အခန်းမှာ ကျနော်နဲ့ ဆရာမ မေငြိမ်းတို့ ညစာသွားစားကြပါသေးတယ်။ တခါ ပိုပြီး သတိရဖို့ ဖြစ်တာက ၁၉၉၇ ခုနှစ်မှာပြုလုပ်တဲ့ ဘီအမ်စီ ညီလာခံမှာ သူနဲ့ ကျနော်က စာတမ်းတယောက် တစေါင်စီ ရင်ဘောင်တန်းပြီး တက်ဖတ်ခဲ့ကြတာပဲ။ အခုတော့ သူက ပစိဖိတ်သမုဒ္ဒရာကြီးရဲ့တဖက်ကမ်းကိုရောက်သွားပြီး နယ်စပ်က ကျနော်တို့ ကို မေ့နေလောက်ပြီဆိုပါတော့။
ဘာကြောင့်ရယ်မသိ ညီလာခံပြီးတဲ့အခါ စာတမ်းတင်တဲ့ကိုယ့်တာဝန်ပြီးဆုံးတဲ့အခါ လွတ်လပ်ပေါ့ပါးသွားပြီဆိုကာမှ ကျနော်က အခန်းထဲမှာထိုင်နေရင်း လွန်ခဲ့ပြီးတဲ့ အချိန်ကာလတချို့ ဆီ ပြန်ရောက်သွားနေမိတယ်လေ။ ကျနော့်ရဲ့စိတ်က ဟ်ိုးလွန်ခဲ့တဲ့ ၁၀ နှစ်ကျော်က နော်ဝေနိုင်ငံ အော်စလိုမြို့ က ဒီမိုကရက်တစ်မြန်မာ့အသံမှာ အသံလွှင့်သမားအဖြစ် တော်လှန်ရေးတာဝန်ထမ်းဆောင်ခဲ့ရတာတွေကို ပြန်ပြီးတွေးနေမိတယ်။ တော်လှန်ရေးတာဝန်လို့ ကျနော်ပြောတာ အကြောင်းရှိပါတယ်။ ဒီတုန်းက အော်စလိုမှာရှိတဲ့ ဒီဗွီဘီ ဝန်ထမ်းအဖြစ် တော်လှန်ရေးတာဝန်တရပ်အနေနဲ့  သက်ဆိုင်ရာက ကျနော့်ကို တာဝန်ပေးခဲ့တာပါ။ ကျနော် နော်ဝေကို ထွက်ခွါဖို့ ပြင်ဆင်နေတဲ့အခိုက် သက်ဆိုင်ရာတာဝန်ရှိတဲ့လူကြီးတွေက “မင်းကို ဒါ တော်လှန်ရေးတာဝန်တရပ်အနေနဲ့ လွှတ်တာ ဒါ အဆင့်မြင့်တာဝန်ပဲ” ဆိုတဲ့စကားလုံးမျိုးသုံးပြီး ကျနော့်ကို တာဝန်ပေးလို့  သွားခဲ့တာပါ။ နော်ဝေမှာသွားပြီး ဒီအလုပ်ကိုလုပ်ဖို့ ကျနော့်မှာ တကြိမ်တခါမှ မတွေးခဲ့ဘူးပါဘူး။ ကျနော် ဂုဏ်ယူစွာနဲ့ သွားခဲ့တာပါ။ ဟိုကြတော့ အခု ဘီအမ်အေ ဥက္ကဌလုပ်တဲ့ ကိုမောင်မောင်မြင့်နဲ့ ဒီဗွီဘီမှာ ဆုံရတာပဲလေ။
ဒီတုန်းက ဒီဗွီဘီမှာ ကျနော်တို့ က တယောက်ကို အပါတ်စဉ်အသံလွှင့်အစီစဉ်တခုစီ တာဝန်ယူပြီး အသံလွှင့်ခဲ့ကြတာ။ ကိုမောင်မောင်မြင့်ရဲ့ “ရွှေမောင်းဒေါင်းညို” အစီစဉ်က အပေါက်ဆုံးပေါ့။ရွှေမောင်းဒေါင်းညို အစီစဉ်က ကိုမောင်မောင်မြင့်ရေးပြီး ကိုမောင်မောင်မြင့်စီစဉ်တဲ့ အစီစဉ်ပါ။ “ဒေါင်းညို” ဆိုတာက ကိုမောင်မောင်မြင့်ပါ။ “ရွှေမေါင်း” အဖြစ်နဲ့ က ကိုအေးချမ်းနိုင်ပါ။ (ယခု ဒီဗွီဘီ ညွှန်ကြားရေးမှူး၊ သူကလည်း လူ့ အခွင့်အရေးဆိုတဲ့ အသံလွှင့်အစီစဉ်ကိုတာဝန်ယူထုတ်လွှင့်နေတဲ့အချိန်ပါ။) ရွှေမောင်းနဲ့ ဒေါင်းညို လူနှစ်ယောက် အချီအချစကားပြောခန်းပါ။ နိုင်ငံရေးသရော်စာပါ။ ( ဟဲ ဟဲ မြဝတီရုပ်သံကလွှင့်တဲ့ အကိုကြီးညီလေးစကားပြောခန်းက သူတို့ နောက် အများကြီးနောက်ကျပြီးမှ ပေါ်လာတာပါနော။ ) ကျနော်တို့ အထဲမှာ ဒီဗွီဘီရဲ့ အအောင်မြင်ဆုံးအစီစဉ်ဖြစ်ခဲ့တာပေါ့။ ကြုံတုန်း မှတ်တမ်းလေးများဖြစ်လိုဖြစ်ငြား ထည့်ပြောရမယ်ဆိုရင် အဲဒီတုန်းက ဒီင်္ဗွီဘီဝန်ထမ်း ( ၁၃ ) ယောက်ရှိပါတယ်။ ညွှန်ကြားရေးမှူးက ဦးဟန်( ဦးဟန်ညောင်ရွှေ )ဖြစ်ပါတယ်။ ဒုညွှန်မှူးက အံတီပြုံး (ဒေါခင်ပြုံး-အော်စတေးလျ) ဖြစ်ပါတယ်။ အယ်ဒီတာချုပ်က အံကယ်ကြီး ဒေါက်တာအောင်ခင်ပါ။ ကျန်တာတွေက ကျနော်၊ ကိုမောင်မောင်မြင့်၊ ကိုမွန်းအောင်(တေးသံရှင်)၊ ကိုအေးချမ်းနိုင် (ယခု ညွှန်မှူး) ၊ မသီတာ၊ မမိုးမိုးထွန်း၊ ကိုသိန်းထိုက်ဦး(ထိုက်သူနိုင်-ယခု င်္ဗင်္င်္ွီအိုအေ )၊ ကိုထွန်းထွန်း၊ စေါနယ်လ်ဆင်ခူး၊ ကိုကျော်ကျော်တို့ ဖြစ်ပါတယ်။ အခုတော့ ကိုမောင်မောင်မြင့်နဲ့ ကျနော်သာ တခါတလေ ဘီအမ်အေကိစ္စစကာြးေ့ပာလို့ ဆုံဖြစ်တာကလွဲပြီး ကျန်တဲ့သူတွေနဲ့ တော့ အဆက်အသွယ်ပြတ်ကုန်ကြပြါ့ပီ။ ဒါကလည်း ကိုယ်ဝါသနာပါရာ ကိုယ်ထက်သန်ရာလမ်းကို ရွေးချယ်လျောက်ကြရင်းက လူတွေ တယောက်နဲ့ တယောက် ဝေးကွာသွားကြရတာ သဘာဝတော့ကျပါတယ်။ မုန်တိုင်းကထန်တယ်လေ။ တချိန်က တကိုင်းထဲနားခဲ့ကြပေမယ့် အခုတော့ တချို့ က နွေကြိုငှက်။ တချို့ ကြတော့ တေးသီငှက်။ စိတ်ဖြေလို့ ရတာတခုတော့ရှိပါတယ်။ ကျနော်တို့ အထဲက ဘယ်သူမှ ခိုးသားဓါးပြတွေရဲ့ရွာကလေးဆီ ရောက်မသွားခဲ့ကြတာကိုတော့ ကျနော်ကျေနပ်တယ်။ ဒါပေမယ့် ကျနော်ကတော့ ဒါတွေကို လွမ်းတော်မူလို့ စာကိုစီရတာ မဆုံးနိုင်ပါဘူး။
ဒီနေရာမှာ ကိုမောင်မောင်မြင့်နဲ့ အခုလိုဆုံဖြစ်ကြတာတောင်မှ သူက အဖွဲ့ အစည်းတခုရဲ့ထိပ်ပိုင်း တာဝန်ရှိသူလည်းဖြစ်ပြန် တကယ်လည်း အလုပ်တွေလုပ်နိုင် အလုပ်တွေပိနေတဲ့သူဖြစ်တော့ တနှစ်နေလို့ မှ ကဗျာလေးတပုဒ်တလေရေးပြီး ဘဝကိုကျေနပ်နေမိတဲ့ကျနော်က သူ့ ကို အလိုက်သိစွာပဲ ခတ်ခွါခွါနေလိုက်မိပါတယ်။ ညီလာခံ ဒုတိယနေ့  ကျနော် နေ့ လည်စာစားနေတုန်း ထမင်းစားခန်းထဲ ဖြတ်သွားရင်းက ကျနော့်ပခုံးကိုဖိကိုင်ပြီး “ကိုငြိမ်း ခင်ဗျားနဲ့ ကျနော်စကားပြောချင်သေးတယ် အေးအေးဆေးဆေးကို စကားမပြောနိုင်သေးဘူးဗျာ” လို့ သူ နှုတ်ဆက်တာကို ကျနော် ကျေနပ်စွာပဲ ကြည်နုးလိုက်ပါတယ်။ ကျနော်ကတော့ လွန်ခဲ့တဲ့ ဆယ်နှစ်ကျော်က အသံလွှင့်ခန်းတခုထဲ သူနဲ့ ကျနော် နောက်ပြောင်ခဲ့ကြတာတွေ ကျနော်နဲ့ ကိုမွန်းအောင်တို့ နော်ဝေကြက်ခြေနီစခန်း (ကျနော်တို့ ကတော့ အဲဒါကို ဒုက္ခသည်စခန်းလို့ ပဲ သုံးနှုန်းခဲ့ကြပါတယ်) ရောက်နေတဲ့အခိုက် သူလိုက်လာပြီး မြှောက်ပေး (အဲလေ မှားသွားတယ် အားပေး) ခဲ့တာတွေ ကျနော်ဘယ်မေ့လို့ ရနိုင်ပါ့မလဲ။ ကျနော့်အထင် ဘီအမ်အေမှာ အဖွဲ့ ဝင်တယောက်အဖြစ် ပါနေတာကိုယ်၌က သူနဲ့ ပုဂိုလ်ရေးသံယောဇဉ်ခတ်တဲတဲတခု ကျနော့်မှာရှိနေသေးလို့ ဖြစ်ကောင်းဖြစ်မယ်လို့ တွေးကြည့်မိပါတယ်။ ကျနော်က အဖွဲ့ အစည်းနဲ့ လုပ်ရကိုင်ရတဲ့အလုပ်ကို မကျွမ်းကျင်လို့  ဘယ်အဖွဲ့ အစည်းကိုမှ ထဲထဲဝင်ဝင် ဝင်မလုပ်ခဲ့တာ ကြာပါပြီ။ ( ကျနော်က ကဗျာရေးတယ်လေ။ ကဗျာဆရာဆိုတာ စင်ပြိုင်အစိုးရဖြစ်တယ်မို့ လား။ ဒါဆို လုံလောက်ပြီပေါ့။ )
အတွေးတွေက တော်တော်ဝေးဝေးအထိ ရောက်သွားခဲ့ပါတယ်။ ကျနော်တို့ ထမင်းစားဆင်းကြရင် ကောင်းမလားလို့ လှမ်းမေးလိုက်တဲ့ ဆရာနေမျိုးအေးရဲ့စကားနဲ့  ကျနော့်အတွေးကို ဖြတ်ခဲ့ရပါတယ်။ ကျနော်တို့ အခန်းက ငုံ့ ကြည့်ရင်မြင်ရတဲ့ ကွက်လပ်ကလေးမှာ ညစာစားပွဲပြင်ထားတာ သေချာတယ်ဆိုပြီး ကွက်လပ်ကလေးဆီ ဆင်းလာလိုက်ကြပါတယ်။
ညစာစားဖို့ ပြင်ဆင်ထားတဲ့ကွက်လပ်ကလေးမှာ လူတွေသိတ်မရှိသေးပါဘူး။ ကျနော်တို့ က အခြေအနေအကဲခတ်ပြီး ထမင်းစားချင်နေကြပြီလေ။ ဒါနဲ့ တယောက်ယောက်ကိုမေးကြည့်တော့ စားလို့ ရပြီပေါ့။ ကျနော်တို့ က လူတွေမများခင် ထမင်းစားနှင့်ချင်ကြတယ်လေ။ တော်ကြာ သီးလေးသီးအငြိမ့် ပြီးတော့ နတ်ရေကန်ကျ(စူဠရေထဲလွှတ်လို့ တော့မဆိုလိုပါဘူးနော်။) အဆိုတော်ရဲဘော်တွေရဲ့ ဖြေဖျော်ပွဲတွေနဲ့ တိုးရင် လူတွေများပြီး ထမင်းစားရတာ ဇိမ်မကျဘူးလို့ ယူဆမိလို့ ပါ။ ပြီးတော့ ကျနော်က အခန်းပြန်ပြီး မှတ်စုတွေရေး မနေ့  က မြို့ ထဲသွားဝယ်ထားတဲ့ စာအုပ်တွေ နည်းနည်းမြည်းကြည့်ချင်နေပြီလေ။
ကျနော်တို့ ထမင်းစားနေတုန်း ကွက်လပ်ကလေးထဲ လူတွေချက်ချင်းရောက်လာပါတယ်။ ကွက်လပ်ထိပ်က ဧည့်ခံဖြေဖျော်ရေးစင်မြင့်ကလေးပေါ်မှာ ဆောင်းဘောက်တွေ မိုက်တွေ ပြင်ကြ ဆင်ကြတဲ့သူတွေကိုလည်း တွေ့ လာရပါတယ်။ ထမင်းထိုင်စားနေတုန်းမှာပဲ မိုက်ကရိုဖုံးကိုင်ပြီး လူတယောက် စင်မြင့်ကလေးပေါ်တက်လာပါတယ်။ နတ်ရေကန်ကျအဆိုတော် ဘီဘီစီ ကိုအောင်ကျော်ဦး ကို ဘိတ်ခေါ်နေတဲ့အသံ ထွက်ပေါ်လာပါတယ်။ မိုက်ကရိုဖုံးကိုင်ပြီး ဧည့်ခံဖြေဖျော်ပွဲ ကွင်းဖွင့်လိုက်တဲ့သူကို မြင်ဖူးပါတယ်ဆိုပြီးသေသေချာချာကြည့်တော့ ကျနော်တို့ ရဲ့ ခေတ်ပြိုင်ဆရာလေး မန်းမျိုးမြင့်ဖြစ်နေပါတယ်။ မန်းမျိုးမြင့်ရဲ့ ဖိတ်ခေါ်သံမဆုံးခင်မှာပဲ ဘီဘီစီသတင်းထောက်ကြီး ကိုအောင်ကျော်ဦး စင်ပေါ်ရောက်လာပါတယ်။ သူ့ ဆီကိုကြိုတင်ဖိတ်စာပို့ ထားဟန်တူပါရဲ့ မန်းမျိုးမြင့်ရဲ့လက်ထဲက မိုက်ကရိုဖုံးကို လုမယူရုံတမယ်လှမ်းယူပါတယ်။ ပြီးတော့ ဧည့်နှင်ဖြေဖြော်ရေး အဲလေ ဧည့်ခံဖြေဖျော်ရေးသီချင်း တပုဒ်ကို သံကုန်ဟစ်ပါတော့တယ်။ ကျနော်တို့ လည်း ကိုယ့်တမြို့ ထဲသားရဲဘော်တွေကို အားပေးရမှာပေါ့ဆိုပြီး ကမန်းကတန်းထမင်းစားပြီး အပေါ်ပြန်တက်လိုက်ကြပါတယ်။( အပေါ်ထပ် ကျနော့်အခန်းကငုံ့ ကြည့်ရင် အောက်ထပ်က သူတို့ အော်ကြဟစ်ကြတာတွေကို မမြင်ချင်မကြားချင်အဆုံးမို့ အဲဒီ အထူးတန်းကပဲ အားပေးလိုက်မယ်ဆိုပြီး ဆုတ်ခွါလာခဲ့ကြတာပါ။)
အခန်းကိုပြန်ရောက်တယ်ဆိုရင်ပဲ ကွက်လပ်ကလေးထဲက သီဆိုကခုန်နေတာတွေကို အားနာနာနဲ့ ခဏတော့ ကျနော် ထိုင်ပြီး မုဒိတာပွါးလိုက်ပါသေးတယ်။ ဆရာ နေမျိုးအေးကတော့ အပြင်ဖက်ဧည့်ခန်းထဲမှာ တီဗွီထိုင်ကြည့်ပါတယ်။ အော် အဖွဲ့ အစည်းကိစ္စတွေ ထဲထဲဝင်ဝင် ဝင်မလုပ်ဘူးဆိုပေမယ့် ထမင်းစားနေတုန်းက ဖြောင့်အောင်ထိုင်မစားနိုင်လောက်အောင် ဗျာများခဲ့ရပါသေးတယ်။ ကျနော်တို့ ငါးယောက်အဖွဲ့ က မနက်ဖြန်မနက် ( ၅ ) နာရီမှာ ဟော်တယ်ကနေပြီး ထွက်တော်မူနန်းကခွါမယ်နော်ဆိုတဲ့ ကြိမ်နဲ့ ရိုက်ခေါ်လိုက်တဲ့အသံကို ကိုမိုးကျိုးဆီက ကြားလိုက်ရပြီးကတည်းက ကိုယ်နဲ့ တကားထဲစီးလာကြတဲ့ ကျန်တဲ့ပိုဂိုလ်တွေဆီ ဖုံးတွေတိုက်ရိုက်ဆက် တဆင့်ခံနဲ့ လိုက်ဆက်ပြီး ဘယ်သူကမှပေးတဲ့တာဝန်မဟုတ်ပေမယ့် ကျနော့်တာဝန်လို သဘောထားပြီး ပြာယာခတ်ခဲ့ရပါတယ်။ အားလုံး သေသေချာချာပြောပြီးပြီဆိုမှပဲ ထမင်းကိုမြိုလို့ ကျနိုင်ခဲ့ပါတယ်။
ခဏနေတော့ ဆရာနေမျိုးအေးက အခန်းထဲဝင်လာပြီး အိပ်ယာပေါ်လှဲလိုက်ပါတယ်။ ဒီတော့ နစ္စဂီတနဲ့ သာယာနေတဲ့ကျနော်က အိပ်ယာဝင်ဘုရားရှိခိုးတော့မယ့် သူ့ ကို အနှောက်အယှက်ပေးရာရောက်တော့မှာပဲဆိုပြီး အိမ်ရှေ့ ခန်းကို ဂီတတဏှာအမျှဉ်တန်းလန်းနဲ့ ပဲထွက်ပေးလိုက်ပါတယ်။
အိမ်ရှေ့ ခန်းမှာ ကွန်ပျူတာလက်ပ်တော့လေး စတိုင်ကျကျဖွင့်ပြီး ကျနော်မှတ်ရမယ့်အချက်တွေ မေ့မှာစိုးလို့ မိုက်ကရိုဆော့ဝပ်မှာရိုက် ပြီးတော့ သေသေချာချာစေ့ဖ်လုပ်၊ ပြန်ဖတ်။ အလုပ်ပြီးတော့ အီးမေးချက်ကြည့်လိုက်ပါသေးတယ်။ ကျနော့်ဘလော့လေးကို ဖွင့်ဖတ်လိုက်ပါသေးတယ်။ နောက်တော့မှ စာဖတ်စရာရှိတာနဲ့ ကွန်ပျူတာကို ဆိုင်းအောက်လုပ်ပြီး ပိတ်ပါတယ်။ ဆိုင်းအောက်လုပ်တယ်ဆိုလို့ ကွန်ပျူတာ ဆိုင်းအောက်လုပ်တဲ့အချိန်တိုင်း သွားသွားပြီးသတိရနေတဲ့ ကဗျာလေးတပုဒ်ရှိပါတယ်။ အဲဒီကဗျာထဲမှာ ကျန်တာတွေ ကျနော် မမှတ်မိပါဘူး။ ဒါပေမယ့် ဘဝမှာ ဆိုင်းအောက်မလုပ်လို့ မဖြစ်တဲ့အရာတွေဆိုတဲ့သဘော ရေးသွားတဲ့ ပန်းချီဆရာ ထိန်လင်းရဲ့ကဗျာတပုဒ်ပါ။ အခုလည်း ကျနော်ကွန်ပျူတာလေးကို မပိတ်ခင် အီးမေးချက်ထားတာမို့ ဆိုင်းအောက်လုပ်ရပါလိမ့်မယ်။
မနေ့ က ဝယ်လာတဲ့စာအုပ်သုံးအုပ်ကို စားပွဲပေါ်တင်လိုက်ပြီး ပထမဆုံး ထိုင်း စာပေသမိုင်းစာအုပ်ကို အရင်လှပ်ကြည့်ပါတယ်။ ပြီးတော့မှ စာအုပ်မျက်နှာဖုံးက စာအုပ်နာမည်ကို ကမန်းကတန်းဖတ်ပါတယ်။ ကျနော် ပက်လက်လန်သွားလုမတတ် စ်ိတ်ပျက်သွားရပါတယ်။ ကျနော်က မနေ့ က အဲဒီစာအုပ်ကို ပြန်ချင်ဇောနဲ့ ကမန်းကတန်းစာအုပ်စင်ကဆွဲယူပြီး ငွေရှင်းပေးခဲ့တာကိုး။ ကျနော့်စိတ်ထဲ တော်တော်လေးကျေကျေနပ်နပ်နဲ့ ဝယ်ခဲ့တဲ့စာအုပ်။ ဝယ်လာတဲ့စာအုပ်သုံးအုပ်ထဲမှာကလည်း အဲဒီစာအုပ်က ဈေးအကြီးဆုံး။ သုံးရာနီးပါး။ ခုတော့ ပိုက်ဆံတွေတန်ဘိုးကြီးနေရတဲ့ကြား စာပေနဲ့ ယဉ်ကျေးမှုနဲ့ မှားဖတ်ပြီး ဝယ်ခဲ့မိတာကို အခုမှ ကျနော်တွေ့ တော့တာကိုး။ အင်္ဂလိပ်စာမှာက ကားလ်ချားနဲ့ လစ်ထရေးချားနဲ့ က ချားချင်းအတူတူဆိုတော့ ကျနော့်မျက်စိထဲ ကားလ်ချားကို လစ်ထရေးချားဆိုပြီး တခါထဲ လာရကျိုးနပ်တယ်လို့ တောင် ထင်ခဲ့မိတာ။ ဒီလိုဖြစ်သွားတော့ ဟိုကျန်တဲ့စာအုပ်နှစ်အုပ်ကိုပါ အမြင်ကပ်ပြီး ကောက်မကိုင်ချင်လောက်အောင်ဖြစ်ခဲ့ရပါတယ်။
ကဲ ကျနော့်ရဲ့ ဒီ ခရီးသွားအခန်းဆက်ဆောင်းပါးတွေကို နိဂုံးချုပ်ပါတော့မယ်။ ကျနော်တို့ နိုင်ငံ ပြုပြင်ပြောင်းလဲရေးအတွက် လေးတွေမြှားတွေပြင်ကြသကြ ဖလှယ်ကြ သင်ကြပြကြ ။ သုံးရက်တာကာလမှာ ကျနော် အားလုံးကိုချစ်ခင်ခဲ့ပါတယ်။ ချစ်ခင်နိုင်အောင်လည်း ကြိုးစားပါတယ်။ အားလုံးကို လေးနက်မိပါတယ်။ ကျနော်တို့ မနက်ဖြန်ဆိုရင် ကိုယ့်အသိုက်မြုံရှိရာ ကိုယ်စီကိုယ်ငှ ထွက်ခွါကြပါတော့မယ်။ ဒီ သုံးရက်တာကာလ ကျနော်ကြုံတွေ့ ခံစားရတဲ့ “ပျားအုံခံစားမှု” ဟာ တကယ့်ကို ချိုမြိန်ခဲ့ပါတယ်။ မနက်ဖြန်ဆိုရင် မနက်အစေါကြီး ကျနော်တို့ ဒီ “ခွန် ဖူကန်” ဟော်တယ်က ထွက်ခွါကြပါတော့မယ်။ ချင်းမိုင်မြို့ ကလေးက ထွက်ခွါကြပါတော့မယ်။ ဒါကြောင့်မို့ ဘဝအမေါတွေနဲ့ အိပ်မေါကျနေကောင်း ကျနေမယ်ထင်ရတဲ့ ဒီ ဟော်တယ် နဲ့ ဒီမြို့ ကလေးကို ဒီညကတည်းကပဲ ကျနော်နှုတ်ဆက်ပြီးမှ အိပ်ယာဝင်လိုက်ရပါတယ်။
See u ခွန် ဖူကန်...
See u ချင်းမိုင်......။ ။
ငြိမ်းဝေ
ပုံ ( ၁ ) ဘီဘီစီ ကိုအောင်ကျော်ဦး နဲ့ ခေတ်ပြိုင် မန်းမျိုးမြင့်တို့ သီချင်းဆိုနေစဉ်
ံ့ပုံ ( ၂ ) ညီလာခံအပြီး ဘီအမ်အေ အစည်းအဝေး
့ပုံ ( ၃ ) See u ခွန် ဖူကန်
ပုံ ( ၄ ) See u ချင်းမိုင်
ပုံ ( ၅ ) မဲဆောက်ပြန်ရောက်ပြီး ကဗျာဆရာ့ကဖေး တွင် ညီလာခံ အာလူးနှင့် ကိုက်လံကိုပြန်လည်တမ်းတနေသူများ(ခင်မင်းဇော်-ကြောပေးထိုင်နေသူ၊ ငြိမ်းဝေ ၊ ဆရာ ဦးချိန်ဝမ်း ၊ ဆရာနေမျိုးအေး )
ဂ ၊ ၃ ၊ ၂၀၁၀ တွင်ရေးသားပြီးစီးသည်။
