(က)
တံတားကိုဖြတ်ကျော်ခဲ့ပြီးကာမှ
တမ်းတတတ်တဲ့ရင်ဟာ
တခွင်လုံး မိုးသားတွေပြည့်လို့ ......။
(ဖော်ဝေးရဲ. နံနက်ခင်း ချောက်ကမ်းပါး... ကဗျာမှ)
၁၉၉၂-ခု၊ ဇွန်လ(၂၀)ရက်...။
တောငှက်ပျောရွက်ကို အမိုးအကာလုပ်ထားသည့်တဲကလေးပေါ်တွင် ကျနော်တယောက်တည်းရှိ နေသည်။ ကြောအောက်တွင် ပုဆိုးတစ်ထည်ကိုခင်းပြီးလဲလျောင်းလျက်။ လွယ်အိပ်ကိုခေါင်းခုလုပ်၏။ ကြော အောက်မှ မညီမညာဝါးကြမ်းခင်းမှာ ခိုးလိုးခုလုဖြစ်နေ၏။ တုံးလုံး လှဲလိုက်စဉ်က အနေရ ထိုင်ရသက်တောင့် သက်သာမရှိသည့်စိတ်မှာ လရောင်များကိုမြင်တော့ ယူပစ်လိုက်သလိုပျောက်သွားရ၏။ တဲအမိုးတောငှက် ပျောရွက်အဖျားပေါ်တွင် လရောင်များလိမ်းကျံလျက်.....။
လရောင်များကိုမြင်တော့ စိတ်မောလူမောဖြစ်နေခြင်းမှာ လျော့ကျသွားနေ၏။ ယုတ်စွအဆုံး တဆစ် ဆစ်ကိုက်ခဲနာကျင်နေသောခန္ခာကိုယ်သည်ပင် တဖြေးဖြေးပြေလျော့သက်သာသွားရ၏။ ကွဲပျက်လျက်ရှိ သည့်ငှက်ပျောရွက် လက် ကြားများမှတဆင့် လရောင်များသည် ကျနော့်ခန္ခာကိုယ်ပေါ် ပဆစ်အိမ်ဖွဲ့ နေကြပေပြီ။
ရှေ.ဆက်ရမည့်ခရီးမှာ မှူန်ဝါးလျက်ရှိနေသည်။ ကျောင်းသားတပ်မတော်မှ တပ်ရင်း(၂၁၀)၊ တပ်ရင်း မှူး `ကိုဆန်းလင်း´ကို ရုတ်တရက်မတွေ့နိုင်တော့သည်မှာသေချာ၏။ ထို့ပြင်`ကိုဆန်းလင်း´ဆီ စက်ဖြင့်အ ကြောင်းကြားဖို့ဆိုသည်မှာပင် လွယ်ကူဟန်မတူ။ တပ်မဟာ(၂) KNLA တပ်ခွဲမှူး`ဗိုလ်ကျော့မေ´က ကတိ ပေးထားသည့်တိုင်`ကိုဆန်းလင်း´နှင့် လူချင်းတွေ့နိုင်ဖို့မှာမလွယ်ကူမှန်း ကျနော်သိလာရ၏။
`တပ်မဟာမှူးဆီကို ကျနော်စက်နဲ့အခုပဲအကြောင်းကြားပြီးပါပြီ၊ တပ်မဟာမှူးက စီစဉ်ပေးပါ့မယ်လို့ ပြောပါတယ်၊ တပ်မဟာမှူးဆီက အကြောင်းကြားတာနဲ့တပြိုင်နက် ဆရာတို့ ခရီးထွက်ရမယ်ထင်တယ်၊ ဒီကြားထဲ ဒီမှာပဲ နားနားနေနေ ခဏနေပေါ့ နေရထိုင်ရ စားရသောက်ရတာတော့ နည်းနည်းအားနည်းမယ် ထင်တယ်´
`ဗိုလ်ကျော့မေ´နှင့်ကျနော် သည်စခန်းကိုရောက်ရောက်ချင်းပြောခဲ့ကြသည့်စကား။ ရွာမှထွက်လာ စဉ်တုန်းက စဉ်းစားထားခဲ့သည်များမှာ အဆင်မပြေချင်တော့။ တိတ်ပုရွာကိုရောက်တော့`ကိုဆန်းလင်း´မှာ နောက်တန်းသို့ပြန်သွားသည်မှာ (၃)လခန့်ရှိပြီဟုဆို၏။ တိတ်ပုရွာသူကြီးက KNLA မှ`ဗိုလ်ကျော့မေ´ နှင့်တွေ့ပေးမည်ဆို၏။ ကျနော် ခေါင်းငြိမ့်လိုက်ရ၏။ ကျနော်နှင့်အတူလိုက်ပါလာသည့် တရွာတည်း သား`မောင်ကြိုင်´မှာ`ကိုဆန်းလင်း´နှင့် လူချင်း တွေ့ဆုံဖို့မလွယ်ကူမှန်းသိကတည်းကမျက်စေ့မျက်နှာ ပျက်နေခဲ့၏။
`ဆရာလေး....ကိုဆန်းလင်းနဲ့မတွေ့ပဲဖြစ်ပါ့မလား၊ ဗိုလ်ကျော့မေနဲ့ ဆရာလေးကလည်းလူချင်း တွေ့ဖူးခဲ့ တာမဟုတ်တော့ ကျနော်တို့ကို ကူညီပါ့မလား´
`ဒါကတော့ ပြောကြည့်ရမှာပေါ့ကွာ ကိုဆန်းလင်းကလည်း ငါ့ဆီကိုအကြောင်းကြားဖို့၊ ငါကလည်း သူ့ဆီကိုကြိုပြောထားဖို့က လွယ်တာမှမဟုတ်တာပဲကွာ၊ ဒီရောက်လာမှတော့ အဆင်ပြေသလိုဆက်လုပ်ရမှာ ပဲ´
တိတ်ပုရွာသူကြီးအိမ်ကို ကရင်စစ်သားလေးတယောက် သေနတ်လွယ်ပြီး ရောက်လာတော့`မောင် ကြိုင်´ကို သူကြီးအိမ်တွင်ထားရစ်ခဲ့ကာ`ဗိုလ်ကျော့မေ´ရှိရာသို့ကျနော်လိုက်ခဲ့ရ၏။
တဲတလုံးပေါ်တွင် လူသုံးယောက်ကကြမ်းပြင်ပေါ်တွင်ထိုင်လျက်။ လူတယောက်က စစ်ပခက်တလုံး ပေါ်တွင်အိပ်လျက်။ တဲပေါ်ကို ကျနော်တက်တော့ ပခက်ထဲမှလူက ပခက်ပေါ်မှဆင်းပြီး ကျနော့်ကို ကြိုဆို နှူတ်ဆက်၏။`ဗိုလ်ကျော့မေ´၏ ကြိုဆိုနှူတ်ဆက်စကားနှင့့်် လေသံကိုကြားရလျင်ကျနော့်မှ စိုးရိမ်စိတ်များ ကင်းစင်ပပျောက်သလိုဖြစ်ရ၏။
`လာပါဆရာလေး....၊ ဆရာလေးတို့ကို ကျနော်လာတွေ့မလို့ပါပဲ၊ ဒီမှာတခြားရွာကဧည့်သည်တွေ ရောက်လာတာနဲ့ ရဲဘော်တယောက်ကို အခေါ်ခိုင်းလိုက်ရတာပါ။ ထိုင်ပါ... ဆရာလေး...´
`ကျနော်... ဆရာလေးကို လူချင်းမတွေ့ဖူးပေမယ့် နာမည်ကိုကောင်းကောင်းသိပါတယ်၊ ကိုဆန်း လင်းက ဆရာလေးအကြောင်း ခဏခဏပြောပြထားတာပါ၊ ကိုဆန်းလင်းကတော့ နောက်တန်းကို ရုတ်တရက် ပြန်သွားရတယ်ဆရာလေး၊ အခု... ဆရာလေးတို့အလည်လာတာလား၊ ဒါမှမဟုတ် ကိုဆန်းလင်း နဲ့တွေ့မှရမယ့်ကိစ္စလား၊ ကျနော် ဘာအကူအညီပေးရမလဲ၊ ပြောပါ´
ကျနော်က ရွာတွင်တွဲဖက် အ.လ.ကကျောင်းဆရာဖြစ်ပြီး၊`ဗိုလ်ကျော့မေ´က ကျနော့်ကို´ကိုဆန်း လင်း´ခေါ်သလို`ဆရာလေး´ဟုပင် ခေါ်ဝေါ်ပြောဆိုသည်ကိုကြားရတော့ ကျနော့်မှာ အားရှိသွားရ၏။ စိုးရိမ် စိတ်မှာ အနည်းငယ်လျော့ရ၏။
ကျနော်က`မာနယ်ပလော´သို့အပြီးအပိုင်ထွက်ခွါလာခြင်းဖြစ်ကြောင်း`ကိုဆန်းလင်း´နှင့်အမြန်ဆုံး ဆက်သွယ်ချင်ကြောင်းရှင်းပြရ၏။ ရှင်းပြနေရင်းက`ဗိုလ်ကျော့မေ´၏မျက်လုံးများကိုလည်း အဓိပ္ပါယ် ဖော်ရ၏။ အကဲခတ်နေခဲ့ရ၏။
အသားဖြူဖြူ၊ အရပ်မနိမ့်မမြင့်။ ယဉ်ကျေးပျူငှာလွန်းသည့် ကရင်တော်လှန်ရေးစစ်ဗိုလ်တစ်ဦး။ သူ သည် အရပ်သားအ၀တ်အစား ညှိုးညှိုးနွမ်းနွမ်းကို ပင်ဝတ်ဆင်ထား၏၊ ဆံပင်များမှာရက်ပေါင်းကြာမြင့်စွာ မဖြီးမသင်ပဲထားခဲ့ဟန်တူ၏။ တခေါင်းလုံး မညီမညာတောထလျက်ရှိ၏။
`ဒါဆိုရင် ဒီလိုလုပ်ပါဆရာလေး၊ ဆရာလေးတို့နှစ်ယောက်၊ ဒီကနေ့ပဲကျနော့်စခန်းကိုလိုက်ခဲ့ပါ။ စခန်းရောက်ရင် တပ်မဟာမှူးဆီစက်နဲ့အကြောင်းကြားပေးပါ့မယ်၊ ကိုဆန်းလင်းဆီကိုရော ပေါ့၊ ပြီးတော့မှ တိုင်ပင်ပြီးဆက်လုပ်ကြတာပေါ့´
သည်လိုနှင့်ပင် ကျနော်နှင့် မောင်ကြိုင်တို့နှစ်ယောက် ဗိုလ်ကျော့မေတို့တပ်ဖွဲနှင့်အတူ အမည်မသိ တောတွင်း စခန်းတခုသို့လိုက်လာခဲ့ကြရ၏။ သည်စခန်းကို ဘယ်လိုခေါ်သလဲ။ ဗိုလ်ကျော့မေရဲ့တပ်ခွဲအမှတ်၊ မမေးသင့်ဘူးထင်သဖြင့် မမေးပဲနေလိုက်၏။
တညနေခရီးလမ်းလျှောက်လာပြီးနောက် ဗိုလ်ကျော့မေ၏တပ်ခွဲစခန်းချရာနေရာသို့ ချဉ်းကပ်လာခဲ့ ကြသည်။ တောင်စောင်းတခု၏ထိပ်တွင် တောငှက်ပျောရွက်အမိုးအကာလုပ်ထားသည့် ယာယီတဲကလေးတစ် လုံးစနှစ်လုံးစကိုတွေ့ရ၏။ တမနက်ခင်းလုံးမိုးတဖွဲဖွဲရွာချထားသဖြင့် တောတွင်းစခန်းကလေးမှာ မိုးရေများ ဖြင့်စိုရွှဲလျက်ရှိနေ၏။
ရောက်ရောက်ချင်းပင် ကျနော်နှင့်မောင်ကြိုင်အတွက် နေရာထိုင်ခင်းစီစဉ်ပေး၏။ ကျနော်က`ဗိုလ် ကျော့မေ´၏တဲနှင့်အနီးဆုံးတဲ(ကျနော့်အတွက် မူလပိုင်ရှင်ကရင်စစ်သားလေးနှစ်ယောက်က နေရာဖယ်ပေး ခဲ့ရသည်ဟုနောက်မှသိရ၏)တွင်နေရမည်ဖြစ်ပြီး`မောင်ကြိုင်´ကမူ ရဲဘော်များစုဝေးတဲထိုးထားရာနေရာတွင် ရဲဘော်များနှင့်အတူ လိုက်နေရမည်ဆို၏။ ကျနော်က`မောင်ကြိုင်´၏ အားငယ်သိမ်ငယ်နေသည့်မျက်နှာ ကြည့်ကာ၊ မောင်ကြိုင်နှင့်ပင်အတူတူလိုက်နေရန်ပြောကြည့်သေး၏။ ဗိုလ်ကျော့မေက လက်မခံပါ။ သူနှင့် ကျနော်အလွယ်တကူစကားပြောလို့ရနိုင်ရန် စီစဉ်ခြင်းဖြစ်ကြောင်းနှင့် မောင်ကြိုင်အတွက် မစိုးရိမ်ရန်ပွင့်ပွင့် လင်းလင်းပဲရှင်းပြခဲ့၏။
မောင်ကြိုင်သည် သေနတ်လွယ်ထားသည့်ကရင်စစ်သားလေး၏နောက်မှ ခေါင်းငုံ့ပြီးလိုက်ပါသွားခဲ့ ရ၏။ ခြေလှမ်းနှစ်လှမ်းသုံးလှမ်းသွားပြီးမှ ကျနော့်ကိုခေါင်းတချက်ငဲ့ပြီးကြည့်၏။ ကျနော်က ပြုံးပြအားပေးနှစ်သိမ့် လိုက်ရ၏။
မိုးချုပ်ကာနီးတော့`ဗိုလ်ကျော့မေ´က ကျနော့တဲပေါ်လာထိုင်ကာ နာရီဝက်ခန့်စကားပြော လေသည်။ ညစာဟင်းမကောင်းသည့်အတွက် စိတ်မကောင်းကြောင်း၊ ဇရပ်ကြီး၊ ကင်ပွန်းခြုံရွာများ တွင် နအဖစစ်တပ်များပိုပြီးအင်အားတိုးချဲ.ချထားလာနေကြောင်း၊ ကျောင်းသားတပ်မတော်က`ကိုဆန်းလင်း´ မှာတပ်ရင်းမှူးတစ်ဦးဖြစ်ပြီး၊သူကမူတပ်ခွဲမှူးအဆင့်သာရှိပါကြောင်း၊ တော်လှန်ရေးဌါနချုပ် `မာနယ်ပလော´ကို သူမရောက်ဖူး သေးသည့်အကြောင်း၊ `မာနယ်ပလော´ မှာ စိတ်ဝင်စားဖို့ကောင်းကြောင်း၊ ရန်သူ့တပ်က ဒဏ်ရာရစစ်ဗိုလ်တဦးကို ဖမ်းမိစဉ်၊´သူ့ကိုမသေခင် မာနယ်ပလောကို ရောက်အောင်ဖို့ပေးစေချင်´တယ် ဟုပြောပြီး သေဆုံးသွားခဲ့ဖူးကြောင်း... လေအေးအေး... အသံတိုးတိုးနှင့် သူချည်းပဲစကားတွေပြောသွားခဲ့၏။ ကျနော်တို့ကိုလည်း `မာနယ်ပလော´ကို သွားမည်ဆို၍ ဂုဏ်ယူပါကြောင်း ပြော၏။ ပြီးတော့ ခရီးပမ်းလာသဖြင့် ကျနော့်ကို နှောက်ယှက်သလိုမဖြစ်စေရန်ဟုဆိုကာ ညဉ့်နက် အောင်မနေပဲ သူ့တဲဆီပြန်သွားခဲ့၏။
တဲပေါ်တွင် ကျနော်တယောက်တည်းရှိသည့်အခါ အထီးကျန်ခြင်း ဧကဒုက္ခမှာ ရုတ်တရက်ကျနော် ဆီဝင်ပူးလိုက်၏။ အထူးသဖြင့် ရှေ့ဆက်ရမည့်လမ်းက မထင်မရှားဝိုးတ၀ါးဖြစ်နေသည့်အခါ ဧကဒုက္ခမှာ ကျနော့်ကို ပိုပြီးကိုင်လှုပ်လိုက်၏။
နောက်တပါတ်ခန့်ကြာသောအခါ ကျနော့်မိတ်ဆွေထဲမှရသည့် ကျနော် ရေးပေးထားခဲ့သည့် စာတ စောင်ကို ဖတ်ကာ `မဒေ၀ီ´သည် ငိုကျွေးကောင်းငိုကျွေးနေလေမလား။ ဒါမှမဟုတ် အကျိုးအကြောင်း ဝေ ကွဲမသိတတ်နိုင်သေးသည့် လူမမယ်သား(၃) ယောက်၏ရှေ့တွင် ကြွေပြုန်းတော့မည့် နှလုံးသားကို ဟန်ဆောင်အပြုံးဖြင့် ဖုံးကွယ်ကာ ကျနော့်စာကိုဖတ်နေလေမလား။ ငယ်ရွယ်နူနယ်လွန်းသည့် လူမမယ်သား (၃)ယောက်ကို ကျနော်တို့၏ အပူမီးများ မဟပ်မိစေရန် `မဒေ၀ီ´ဘယ်လိုများ ပြင်ဆင်ထားလေမလဲ။
တဲပေါက်၀၀ါးကြမ်းခင်းတွင် ထုံးစံအတိုင်း ခြေထောက်နှစ်ဖက်တွဲလောင်းချကာ၊ သူအင်မတန် နှစ်သက်သည့် သီချင်းတပုဒ်ကို အသံမထွက်ပဲဆိုငြီးသည့်`မဒေ၀ီ´ကို ကျနော်မြင်နေရသည်။ သီချင်းသံများ မှာ စစ်တောင်းမြစ်ကိုကျော်ကာ၊ ဇရပ်ကြီး၊ ခင်ပွန်းခြုံ၊လှည်းလမ်းကူးရွာကလေးများ ကိုကျော်ကာ တောင်ခြေ တောစပ်သို့ရောက်လာကြ၏။ မကြာမှီ တိတ်ပုရွာကလေးဆီရောက်လာတော့မည်။ ထို့နောက် ကျနော်ခေတ္တတည်းခို လဲလျောင်းလျက်ရှိရာ ငှက်ပျောရွက် တဲကလေးဆီရောက်လာပေတော့မည်။
သတိရလို့ ကိုယ့်ခန္ဓာကိုယ်ပေါ် ကိုယ်ပြန်ကြည့်တော့ လရောင်များ ဘယ်ဆီခြေထောက်ပေါက်ကုန် ကြပြီမသိ။ ဟိုး... ခတ်ဝေးဝေးမှ မိုးခြိမ်းသံသဲ့သဲ့ကို ကြားရသည်၊ တိမ်မဲများ ရုတ်တရက်ကျနော်တို့ အပေါ်ဖြက်ကျော်သွားကြ၏။ မဲမှောင်တိတ်ဆိတ်လျက်ရှိသော တောအုပ်အတွင်းက အမျိုးအမည်မသိနိုင် သည့် တိရဆ္ဆန်တချို့ အော်မြည်သံကိုကြားရသည်။
ကျနော် ခန့်မှန်းကြည့်သည်။ ကျန်နေရစ်ခဲ့သည့် ကျနော့် မိသားစုကတော့ ကျနော့်ကို စွန့်လွှတ် နိုင်ဖို့ရာ သောကနှင့်မျက်ရည်များ ကိုရင်းကာ အချိန်မည်မျှကြာ အောင်ကုစားယူကြရမည်နည်း။ ကျနော်မ သိနိုင်ပါ။
သေချာသည်ကတော့ နောက်တွင်ကျန်နေရစ်ခဲ့သည့် ကျနော် လျှောက်လှမ်းလာခဲ့ရာလမ်းပေါ်တွင် မူ မိုးတွေရွာနေသည်ကို ကျနော်အလိုလိုသိနေ၏။ ။
(မေလအတွင်းတုန်းက မဇ္ဈိမမှာ တင်ခဲ့တဲ့ စာမူဖြစ်ပါတယ်)
ငြိမ်းဝေ
No comments:
Post a Comment