January 30, 2012

ဘွန်ဆိုင်း ရွာကလေး


တနေ့က
ရွာက လူတစ်ယောက်နဲ့
တယ်လီဖုံး ပြောရတယ်။

ရွာနဲ့အနီးဆုံး
မြို့ကလေးကတဆင့်
သူနဲ့ ကျနော် ဝေဇယန္တာ စက်ကြိုးနဲ့
ဆက်သွယ်လို့ ရခဲ့တာပါ။

ကျနော် ပထမဆုံး မေးတဲ့ မေးခွန်းက
လျှပ်စစ်မီး
ကားလမ်း
ဆေးရုံ ဆေးခန်းနဲ့ စာသင်ကျောင်း။

ရွာဦး ဘုန်းကြီးကျောင်းထိပ်
ရေသိမ်လေး
ချောင်းချိုးရွာဘက် ကွေ့ဝိုက်ပြီးသွားနေတဲ့ ငှက်ပျော တောတန်းကလေး
တဂျွတ်ဂျွတ် တဂျောင်းဂျောင်း မြည်တတ်တဲ့ ကျနော့်အိမ် ကြမ်းခင်း
ဈေးတောင်း ခေါင်းရွက် ကျနော့် ချစ်သူ မဒေဝီ
ရွာနဖူးပေါ် မကြာခဏ ဖြတ်ကျော်သွားနေကြတဲ့ တိမ်တိုက်များ
မနက် သုံးနာရီလောက်
ညောင်ခြေထောက်ဈေးကို အမီသွားကြဖို့
တရွာလုံး လိုက်လံ ဟစ်အော် နှိုးဆော် လူစုကြတဲ့
ဈေးတောင်း ခေါင်းရွက် ကန်စွန်းရွက်သယ် ဟင်းရွက်သယ် ကျနော့် သူငယ်ချင်းများ။

ကျနော့်ရဲ့
အနှစ် နှစ်ဆယ်
ဘွန်ဆိုင်းရွာကလေး
ရွာပြန်မယ့် ကျနော့်ပင့်သက်များ
နယ်စပ်မျဉ်းပေါ် တဝုန်းဝုန်း
ရင်ခုန်သံ လှိုင်းတွေ တဒုံးဒုံး။

ငြိမ်းဝေ
၂၀၊ ၁၊ ၂၀၁၂
သရုပ်ဖေါ်ပုံက ဖဘ မှ ယူထားတာပါ။

January 29, 2012

အိမ်အပြန်လမ်းဟာ ကွေ့ကောက်လွန်းတယ်



တချိန်တုန်းကတော့
ပန်းဆိုရင်လည်း ကြိုင်လှောက်မှ
လမ်းဆိုရင်လည်း ကွေ့ကောက်မှ
မွှေးခဲ့ လှခဲ့တယ်။

အခုတော့
အိမ်ပြန်တဲ့ လမ်း
ကွေ့လွန်း ကောက်လွန်းနေလို့
လှတယ်လို့ကို မမြင်နိုင်တော့ဘူး မဒေဝီ။

ငြိမ်းဝေ
၁၉၊ ၁၊ ၂၀၁၂

January 13, 2012

မျက်ရည်နဲ့ဖွင့်လိုက်တဲ့ ဖ ဘ မျက်ရည်နဲ့ ရိုက်ထားလိုက်တဲ့ ဓါတ်ပုံ



စာလုံးတွေဟာ ဝါးနေတယ်
ဒါပေမယ့်
အဲဒီ သတင်းတွေက မမှုန်ဝါးတော့ဘူး။

မျက်မှန်ကို
ခဏခဏ သုပ်ပြီးမှ ကြည့်နေရတယ်
ဒါပေမယ့်
အဲဒီ သတင်းတွေက သုပ်ပစ်လို့မရအောင်
ထင်ထင်လင်းလင်း ဖြစ်လာနေပြီ။

အမေ ဆုံးတယ်
မျက်ရည် မကျခဲ့ဘူး။

အဖေ ဆုံးတယ်
မျက်ရည် မကျခဲ့ဘူး။

အခု
ထောင်ဗူးဝက
သူတို့ လမ်းလျှောက်ပြီး ထွက်လာကြတယ်
ဘာ့ကြောင့်များ မျက်ရည်ကျလောက်အောင်
စိတ်လှုပ်ရှားနေမိပါလိမ့်။

မျက်ရည်နဲ့ ဆလိုက်ထိုးတယ်
မျက်ရည်နဲ့ ဓါတ်ပုံ ရိုက်တယ်
ကင်မရာခလုပ်ပေါ်မှာ နှလုံးသားနဲ့ပဲ အကြိမ်ပေါင်းများစွာ ဖိနေမိပေါ့။

ငြိမ်းဝေ
၁၃၊ ၁၊ ၂၀၁၂
နေ့လည် ၁၂ နာရီ ၄၀ မိနစ်

ဒီကနေ့ဟာ ကဗျာတပုဒ်ထက် ပိုပြီး ကြီးကျယ်ခမ်းနားနေခဲ့ပြီ်


ဒီကနေ့ဟာ
ရောင်နီမသန်းခင်ကတည်းက  အပြာရောင် သန်းတဲ့နေ့

ဒီကနေ့ဟာ
ရာစု နှစ်ဝက် ချီပြီး မန်းမှုတ် စက်နှိုးခဲ့ရတဲ့
ဖုတ်သွင်းရထား ဆိုက်တဲ့နေ့

ဒီကနေ့ဟာ
ဆည်းဆာပျို နေချိုထဲ
ပဲပြုပ်သယ်ရဲ့ ပဲပြုပ်ချိုချိုလေးဆိုတဲ့ အသံ
ငါ့ရင်ကို အငြိမ်းချမ်းဆုံး ထိမှန် တုန်ခါသွားစေတဲ့နေ့

ဒီကနေ့ဟာ
ရွှေအိုးကို ထမ်း အိမ်ပြန်လာတဲ့ သားတွေရဲ့ ခြေအစုံကို
မိခင်က အိမ်ဝမှာ ရေဆေးပေးတဲ့နေ့

ဒီကနေ့ဟာ
အောင်ပွဲခံ ဗုံတလုံးပေါ်
တနိုင်ငံလုံး တက်ခုန်ပြီး ကကြတဲ့နေ့ ဖြစ်ခဲ့ပေါ့။

ငြိမ်းဝေ
၁၃၊ ၁၊ ၂၀၁၂


January 06, 2012

အတွေးအခေါ်ဟောင်းကို ကမ္မဝါ ဖတ်ကြည့်ခြင်း



(၁)
ဒီ ရက်တွေအတွင်း
ကျနော်တို့ရဲ့ သောကတွေကို
ဆူးတွေနဲ့ သီကုံးရင်း
သွေးတစက်စက် ကျခဲ့ကြရတယ်။

(၂)
လွတ်လပ်မှုကို ယူချင်ရင်
လွတ်လပ်တဲ့ လူတစ်ယောက် ဖြစ်ဖို့
လွတ်လပ်မှုနဲ့ တန်အောင် ထုဆစ်ဖို့
အရေးကြီးနေပြီ။
သူများကို လွတ်လပ်အောင် လုပ်ပေးဖို့
ကျနော်တို့က ပထမ လွတ်မြောက်နေရမယ်။

ကျနော်တို့ ဟာ
ဂူ အပြင်ဘက်ကို ထွက်ပြီး
လရောင် လိမ်းကျံ
ကြယ်ရောင် လိမ်းကျံ
နေရောင် လိမ်းကျံရင်း
ကိုယ်ပိုင် အရှိန်အဝါကို တည်ဆောက်ကြ။
ရန်သူ တည်ဆောက်ပေးတဲ့ ခွန်အားနဲ့
မတူတဲ့
ခွန်အားသစ်ကို တည်ဆောက်ကြ။
ရန်သူခင်းပေးတဲ့
လမ်းနဲ့ မတူတဲ့
ကိုယ်ပိုင် လမ်းသစ်ကို ဖေါက်ကြ။

ရှိခဲ့ဖူးပြီ်
ကျနော်တို့က
အမှားတွေကို အမှားတွေနဲ့ တိုက်ခိုက်ရင်း
ကြီးပြင်း လာခဲ့ကြရတယ်။

ရှိခဲ့ဖူးပြီ
ရန်သူ့လက်နက် ကိုယ့်လက်နက် ဆိုတာလောက်နဲ့
ကျနော်တို့ မိုးသောက်ခဲ့ကြတယ်။

ထုချေပစ်လိုက်ပါ
ဖွပ်လျှော်ပစ်လိုက်ပါ။
ရန်သူက
ကျနော်တို့အပေါ်
ရန်သူလို သဘောထားနေတဲ့အချိန်
ကျနော်တို့ကလည်း
ရန်သူကို ရန်သူလောက်ပဲ မြင်နေရင်
ကျနော်တို့ မအောင်မြင်နိုင်ဘူး။
ရန်သူ ဆွဲကိုင်တဲ့ သေနတ်လောက်နဲ့
ကျနော်တို့
ဒီတိုက်ပွဲ အောင်ပွဲမဆင်နိုင်ဘူး။

အတွေးအခေါ်အရာမှာ
တောမီးကို
ရှို့မီးနဲ့ လှန်ပစ်တဲ့ခေတ်ဟာ
မနှစ်တနှစ် ကတည်းက
ကုန်ဆုံးသွားခဲ့ပြီ။

(၃)
ကျနော်တို့
ဆူးတွေက သွေးတွေကို မတိတ်စေနိုင်ဘူး။

ငြိမ်းဝေ
၅၊ ၁၊ ၂၀၁၂
လွတ်လပ်ရေးနေ့ရဲ့ နောက်တနေ့။