ကြည်မောင်သန်း is Freedom

ဒီအချိန်က

ကျန်ခဲ့တဲ့ စာမျက်နှာထက်

နောက် တစ်မျက်နှာကို မလှပ်ပဲ

ကြိုဖတ်တတ်ဖို့ အရေးကြီးတယ်

ခင်ဗျားလည်း ပျံသန်း

ကျနော်တို့လည်း ပျံသန်းခဲ့တာပဲ

ကောင်းကင်ချင်း မတူဘူး

သစ်တောချင်း မတူဘူး

ရှူရရှိုက်ရတဲ့ လေချင်း မတူဘူး

ဒါပေမယ့် တူခဲ့ပါတယ်

ကျနော်

ခင်ဗျားအသံကို မကြားဖူးဘူး

ခင်ဗျားကို မမြင်ဘူးဖူး

ဒါပေမယ့် မြင်ခဲ့ ကြားခဲ့ပါတယ်

တခါတုန်းက

ခင်ဗျားနဲ့ကျနော်

ကဗျာထဲမှာ တွေ့တယ်

ခင်ဗျားနဲ့ကျနော်

အလယ်ရိုးမမှာ တွေ့တယ်

ခင်ဗျားနဲ့ကျနော်

အရေပြားပေါ်မှာ

ဘော့ မာလေရဲ့သီချင်းကို ကူးရေး

သစ္စာလေးပါးကို ဆင်ခြင်

ကိုယ့် အမာရွတ်ကို ကိုယ်စီ လျှာနဲ့သပ်

ကျနော်တို့ မတ်မတ် ရပ်ခဲ့ကြတယ်။

ဒီလိုအချိန်မျိုးမှာ

ခင်ဗျားနဲ့ကျနော်

မညီညွတ်ရင် မလွတ်မြောက်ဘူး ဆိုတာထက်

လွတ်မြောက်မှ ညီညွတ်နိုင်တယ်ဆိုတာကို

ပိုပြီး သဘောတူခဲ့ကြတယ်

ဒီကနေ့

ကျနော့်ရဲ့ လျှို့ဝှက် အဘိဓါန်မှာ

ဝေါဟာရအသစ်တစ်လုံး ရေးထိုးလိုက်တယ်

ကြည်မောင်သန်း is Freedom…

( ကွယ်လွန်သူ ကဗျာဆရာ ကြည်မောင်သန်း သို့ ကြေကွဲမှု အမှတ်တရ ကဗျာ…)

ငြိမ်းဝေ