March 18, 2010

မသိန်းရှင်ဆီ ပို့ ပေးပါ


အပိုင်း (၈)
အပေး အယူ

ညနေအပြန် မှောင်ရီပျိုးလာလျှင် သူတို့သည် ကျနော့်ကို လာဘ်ပေးရန် ကျနော်ရှိရာတွဲသို့ တယောက်ပြီး တယောက် ရောက်လာကြပြီး ငွေများကပ်ပေးသွားသည်။
ကိုယ်ဝန်မပေါ့တပေါ်နှင့် လင်ရှိမယား မအေးမြင့်သည် ငွေပေးတော့မည်ပြုလျှင် ကျနော့် အနား၌ ကိုယ်ချင်း ထိကပ်လာထိုင်တတ်သည်။ ကျနော့် ဒူးကို သူ့ပေါင်နှင့် ထိထားတတ်သည်။ သွေးနုနေသော သူ့ ကိုယ်မှာ နူညံ့နေ၏။ ရမက်ဆန္ဒကြောင့် သူ့ အသားများသည် ပူးနွေးနေလျက်။ သူ့ နှုတ်ခမ်းမှာ နှုတ်ခမ်းဆိုးဆေး ရနံ့သည် သင်းမြနေလျက်။ သူ့ စိတ်ထဲတွင် မီးရထား အမှုထမ်းမှန်သမျှကို ကာမ ဓါးပြ များဟု အထင်သေးထားကာ သူ၏ ရမက်နှိုးဆွမှု အပြုအမူများသည် ရဲတင်းနေသည်။
သူသည် ကျနော် လက်ကို ဆုပ်ကိုင်ပြီးမှ ငွေပေးသည်။

“ဒါဘဲနော်… ကိုယ့်လူ”

သူက ဘာအဓိပါယ်နှင့်မှန်း မသိ ပြောလိုက်တတ်သည်။
သူ့အသံမှာ နွေးပူနေကာ နှစ်ယောက်ချင်း ကပ်ပြောသံမျိုးဖြစ်၏။ သူ့ ယောက်က်ျား ကိုအောင်ထွန်းသည် အခြားတနေရာရာ၌ ထန်းလျက်အိတ်များကို စုဆောင်းနေတတ်၏။
အချို့သည် ညောင်တို ဘူတာတွင် ကျနော် ထမင်း ဟင်းများ ဆင်းဝယ်နေစဉ်၌ အနားလာ ကပ်ရပ်ကာ ပေးသွားကြံသည်။
ကိုရွှေယောက်သည် နတ်မောက်ဘူတာ လက်ဖက်ရည်ဆိုင်တွင် ကျနော် လဖက်ရည်သောက်နေစဉ်၌ စာပွဲရှေ့သို့ လျှောက်လာပြီး သတင်းစာကို ဆွဲကြည့်သည်။ သတင်းစာအောက်၌ တဆယ်တန်တရွက် ထိုးသွင်းသွားသည်။
သူသည် ဆိုင်ထဲမှ မထွက်ခွာမီ “အောက်မှာ”ဟု တိုးတိုးကပ်ပြောသွားသည်။
ကျနော်သည် သတင်းစာအောက်မှ ဆယ်တန် တရွတ်ကို အမှတ်မထင် ယူလိုက်သည်။ လာဘ်ပေးသည်ဟု တကြိမ်တခါမျှ မထင်မိပေ။ ကျနော် ငွေမယူလျှင်သာ ကိုရွှေယောက်ကြီးရင်ထဲတွင် တလေးလေးဖြစ်နေရသည်ကို တွေးမိသည်။ ကျနော့်ကို ငွေမပေးရသေးလျှင် သူ့ ရင်ထဲ၌ လေးလံနေသည်။
ကျနော်သည် သူ့ ငွေကို ဘောင်းဘီ အိတ်ကပ်အတွင်း ထိုးသွင်းလိုက်ရင်း သူ လူကြားထဲသို့ တိုးဝင်သွားနေပုံကို ငေးကြည့်နေခဲ့မိသည်။ သူ့ ခြေထောက်မှာ ဖိနပ်မပါ။ ခေါင်းမှ ဆံပင် ဘုတ်သိုက်သည် တဖွာဖွာ ဝဲပျံနေလျက်။ သူ့ အက်ျီမှာ ချေးများကြောင့် ညိုမွဲရောင် တောက်နေလျက်။ သူ့ ကျော၌ ချွေးများ နစ်နေလျက်။

“ကျနော် စေတနာနဲ့ ပေးထာပါဆရာ… သူများတကာတွေလဲ ဒီလိုဘဲ စားနေကြတာဘဲ၊ တချို့များ တွဲလိုက်တင်တာ၊ တထောင် ကိုးရာကို ပက်ကနဲ ယူလိုက်ကြတာ၊ ကျနော့် ထန်းညက်တလုံးမှ မမိစေရဘူးဆရာ၊ သိကြားမင်း ဆင်းရှာလို့တောင် မတွေ့စေရဘူး၊” ဟု သူသည် သူ ထန်းလျက်တင်ရာ အိမ်သာ အမိုးပေါက်ကို အားကိုးပြီး လက်မထောင်လျက်
ရဲရဲတင်းတင်း ပြောသွားတတ်၏။

တခါတရံ၌ ညိုညို့ ရှေ့တွင် သူတို့ငွေပေးကြလျှင် ညိုညိုသည် မျက်စိမျက်နှာ ပျက်နေတတ်၏။ သူကလည်း အများနည်းတူ ကျနော့်ကို ငွေပေးချင်သည်။ မပေးနိုင်သဖြင့် စိတ်မကောင်းဖြစ်ကာ သိမ်ငယ်နေရရှာသည်ကို ကျနော် မတွေးမိခဲ့ပေ။
ငွေပေးငွေယူ လုပ်နေစဉ်၌ သူသည် မျက်နှာကို တဖက်သို့ လွှဲကာ မှောင်ရီဆိုင်းနေသော ပတ်ဝန်းကျင်ကို ငေးကြည့်နေသည်။
ကျနော့် ကို အခြား မိန်းမများက လာ၍ ရောရော နှောနှော လုပ်သည်ကို သူ စိတ်မချမ်းမသာ ဖြစ်နေရသည်ဟု ကျနော်သည် သာမာန်မျှသာ တွေးနေခဲ့၏။
ထို့ကြောင် မအေးသွယ်ငွေလာပေးလျှင် ကျနော်သည် သူ့ကို ဂရုစိုက် ကြည့်နေခဲ့ရ၏။

မအေးသွယ်သည် အမှောင်ရိပ်ထဲတွင် ကျနော့် နံဘေး၌လာ၍ တိုးကျစ်ထိုင်သည်။ သူ၏ နွေးအိသော ကိုယ်လုံးနှင့်တမင် ဖိကပ်ထားသည်။ သူ့ လက်တဖက်ကို အမှတ်မဲ့ ကျနော့် ပေါင်ပေါ်သို့ တင်လိုက်သည်။ သူက ကျနော့်ကို အသက်ရှိသည်ဟု မထင်။ စကားပြောလျှင် မျက်နှာကို ရှေ့ ငိုက်ပြီး နှစ်ဦးသား ကြားသာရုံ ခပ်တိုးတိုးပြောသည်။ သူ့ အသံမှာ သံလိုက်သံ ပါနေခဲ့သည်။ သူသည် အငြိမ့် မင်းသမီးများထက်အသံ အထားအသို၌ ပို၍ တော်သည်။ တမ်းတသံ၊ ရှိုက်မောသံ အငမ်းမရသံ၊ ရမက်ဆူပွက်သံ၊ ရမက်အင်္ဂါများ လှုပ်ရှားနေမှုကို အထင်းသား ဖော်ပြနေသံ။

“မအေးသွယ်တို့ ကိုလေ …တီဘီစီတွေကော ဂါတ်ဗိုလ်တွေကော၊ ရုံပိုင်တွေ လက်မှတ်စစ်တွေကော မခင်တဲ့လူ မရှိဘူးသိလား၊ ရဲတွေလဲ အကုန်ခင်ကြတာ၊ ဦးလော်လီကြီးတို့၊ ကိုပျားတို့၊ ကိုထွန်းတင်တို့….
“နော်….နော်….ဘယ်သူမှ မအေးသွယ်ဆီက ပိုက်ဆပ်ယူကြတာ မဟုတ်ဘူး၊ မအေးသွယ်တို့လဲ ခင်တတ်ပါတယ်တော်၊ ရှင့်ညိုညိုချည့်မှခင်စရာ မဟုတ်ပါဘူး၊ကဲ…ပြောစမ်း မအေးသွယ့် ကို မခင်ဘူးလား၊ နဲနဲကလေးမှ မခင်နိုင်ဘူးလား၊ တော်ဘီ တော်ဘီ၊ နောက်ကို ရှင့်ကို စကားပြောမယ့်အစား ကျောက်ဆင်းတုကို သွားပြောနေမယ်၊ မောတယ်၊ ရှင်တယောက်ဘဲ မအေးသွယ်ဆီက ပိုက်ဆံ ယူရက်တာ၊ သုံးကျပ်ဘဲယူနော်….”

သူ၏ မျက်စောင်းထိုး မဲ့ရွဲ့ထားသည့် မျက်နှာကို မသဲမကွဲမြင်နေရ၏။ သူ နေရာမှ ထသွားသောအခါ ကျနော်သည် ညိုညိုမည်သို့ ခံစားနေရမည်ကို တွေးနေမိသည်။
ကျနော်သည် ညိုညို့ ခုံသို့သွားထိုင်ပြီး အစောက မအေးသွယ် ကျနော့် အနားလာထိုင်သည်မှာ ရိုးရိုးသားသား ဖြစ်ပါကြောင်း အစီရင်ခံရန် စိတ်စောနေရပြန်သည်။
ကျနော် သူ့ အနား၌ လာထိုင်သည်ကို ညိုညိုသည် လှည့်မကြည့်။
ထိုအခါတွင်ကား ရထားသည် အမှောင်ရိပ်ထဲတွင် မြို့လုင်မှ တိတ်တဆိတ် ထွက်ခွာရန် အားယူနေသည်။ ညိုညိုသည် အပြင်ဖက်မှောင်ပျပျထဲသို့ ငေးစိုက်နေသည်။ သူသည် စိတ်၌ အားငယ်သိမ်ငယ်နေကာ ငြိမ်သက်နေသည်။ တခုခုကို အဆုံးအစ မရှိ တွေးတောနေပုံမျိုးဖြစ်၏။

မြို့လုင်မှ အထွက်တွင် များပြားလှသော ရှေးဟောင်း ဘုရားများသည် အညာဆူးရစ်ခြုံများ အကြား၌ ငြိမ်သက်နေ၏။ တိမ်ကောနေပြီ ဖြစ်သော ကန်ဟောင်းများဖက်တွင် ငှက်ကလေးများ အုပ်လိုက်ချီ ပျံသန်းနေသည်။ ရထား ခုတ်မောင်းနေသံကြောင့် ငှက်ကလေးများ၏ ကျီကျီကျာကျာ တေးသံကိုမူ မကြားရ။
ညီအမသုံးဖော် စေတီသုံးဆူသည် ရထားနံဘေး၌ ဝေ့ကျန်ရစ်ခဲ့၏။ ကျနော်ကား ဥစ္စာစောင့်များဖြစ်ကာ ယခုတိုင်ရှိနေသေးသည်ဆိုသော ထိုညီအမသုံးဖော်ထဲမှ အထွေးဆုံး အလှဆုံး ဥစ္စာစောင့်မကလေးကို စိတ်၌ ထင်မြင်ကြည့်ကာ ညိုညိုနှင့် ယှဉ်ကြည့်နေမိပြန်သည်။
စိတ်ကူးထဲ၌ ညိုညို့ ကိုယ်ပေါ်တွင် ပုဝါရှည်ကြီးတခု ခြုံပေးလိုက်၏။ ပြိုးပြိုးပြက်ပြက် အဝတ်များကို ဝတ်ပေးကြည့်၏။ ထို အဝတ်များ ဝတ်ပေးကြည့်သောအခါ ညိုညိုသည် ရှက်ရှက်ဖြင့် က္ကုနြေ္ဒမဆည်နိုင် ရယ်မောနေပြန်သည်။
ညီအမသုံးဖော်စေတီများ ပျောက်ကွယ်သွားလျှင် ထိုအတွေးများသည်လည်း ဖျတ်ကနဲ ပျောက်ပျက်သွားသည်။

“မအေးသွယ်…ပိုက်ဆံလာပေးတာပါ” ဟု ကျနော်သည် ညိုညို့ကို ရှင်းချက်ထုတ်နေရသည်။ ကျနော်သည် ကိုယ်ကိုညွှတ်လိုက်ပြီး သူကြားသာရုံပြောနေမိ၏။ ကျနော့် အသံမှာလည်း တိုးသက်နေသည်။
“ကို့ ကို မအေးသွယ်နဲ့ ဟိုထင် ဒီထင် ထင်နေမှာစိုးလို့ ပြောပြရတာ”

အတန်ကြာမှ သူသည် လှည့်ကြည့်လိုက်၏။ အမှောင်ရိပ်ရီရီဆိုင်းဆိုင်းတွင် ကျနော့်ကို ပြုံးပြရန် သူ ကြိုးစားနေသည်။ သူ့ အပြုံးပေါ်တွင်ကား သူ၏ အားငယ် သိမ်ငယ်နေမှုများ လွှမ်းနေပြန်သည်။ သူ စိတ်၌ ထိခိုက်နေပုံကို သိသော်လည်း ဘာကြောင့် ထိခိုက်နေရသည်ကိုမူ မသိနိုင်။

“သူများ ဘာမှ မပြောပါဘူး”

ရှေ့မှ ထိုင်ခုံတွင် ထိုင်နေကြသည့် သင်းသင်းနှင့် နုနုတို့က ကျနော့်ကို ငွေထည့်ထားသော စာအိတ်ဟောင်းနှစ်ခု လှမ်းပေးနေသည့်အခိုက်တွင် သူသည် မျက်နှာကို တဖက်သို့ ပြန်လှည့်သွားသည်။

“ဒါဖြင့် ဘာဖြစ်နေရတာလဲ”

ကျနော် မေးသည်ကိုလည်း ပြန်မဖြေတော့ပေ။
အတန်ကြာလျှင် ရုပ်ဒြပ်ပစ္စည်း အပေါင်းသည် အမှောင်နှင့် ရောရှက်ကာ တစတစ ဝါးကာ ပျောက်ကွယ် သွားနေ၏။ညိုညို၏ စိတ်ထိခိုက်နေရမှု အပေါင်းသည်လည်း ဤအမှောင်ထုကြီး အတွင်းသို့ ပြေးဝင်နေကြသည် ထင်သည်။ တချက်တချက်၌ သူ၏ သက်မချသံပေါ်လာနေသည်။ ဤ သက်မချသံများကား အမှောင်ထဲ၌ ရုပ်ဒြပ်ပစ္စည်းများ အဖြစ်ဖြင့် ထင်ရှားစွာ ပေါ်လာနေသည်ဟု ထင်နေရပြန်သည်။
ထိုအခါမှစ၍ နောက်ပိုင်း ရက်များတွင် ကျနော်သည်… “ညိုညို့ ရှေ့မှာ ငွေးမပေးကြနဲ့” ဟု အခြားသူများကို ပြောထားရ၏။
“ဘာပြုလို့လဲ” ဟု သူတို့မေးကြသည်ကို ကျနော်လည်း မဖြေနိုင်။
သူတို့ ညိုညို့ ရှေ့တွင် ငွေပေးလျှင် ကျနော်လည်း မယူတော့ပေ။
သူတို့ သည် ငွေပေးရန်အတွက် ညိုညို့ ကိုပါ ရှောင်တိမ်းနေရသည်။
ရက်အတန်ကြာသောအခါ အချို့ သည် ညိုညို့ ကို မကျေမနပ် ဖြစ်လာကြ၏။ အချို့ က ညိုညို ကို သူတို့အား ဒုက္ခပေးမည့်သူလား ဟူ၍ပင် သံသယဝင်လာကြသည်။ အချို့ သည် ညိုညို့ ကို သူတို့ စိတ်ချယုံကြည်ရသူ၊ သူတို့နည်းတူ ထန်းလျက်ကုန်ကူးသူ ဖြစ်လာစေချင်ကြသည်။

ကျနော့် အဖေ ဆုံးကြောင်း အမေ့ ထံမှ ကြေးနန်းရပြီး ကျနော်အရေးပေါ်ခွင့်ဖြင့် အဖေ့ကို သင်္ဂြိုဟ်ရန် ပြန်မည်ပြုသည့် နေ့ တွင်လည်း သူတို့သည် ကျနော့် ကို ငွေများ စုဆောင်းပေးရန်အတွက် ညိုညို မသိအောင် တိတ်တိတ် ကျိတ် တိုင်ပင်ခဲ့ကြသည်။
သို့သော် ထိုသတင်းမှာ ညိုညို့ ထံသို့ ဘယ်ကဘယ်သို့ ပေါက်ကြားသွားခဲ့သည်မသိ။
ထိုနေ့ နေ့ခင်းက ကျောက်ပန်းတောင်း၌ ခရီးသည်များ မရှိချိ်န်တွင် သူတို့တတွေ ကျနော့် ကို ငွေများပေးရန် စုဝေးလာကြသောအခါ မလှမ်းမကမ်းမှ ညိုညိုပါ လိုက်လာသည်။
သူတို့သည် ဂါတ်တွဲပေါ်သို့ စုဝေး တက်ရောက် လာကြပြီး ကျနော့် ကို ငွေများ စာရင်းပြုလုပ်ကာ အပ်နေစဉ်၌ ညိုညို ဂါတ်တွဲတဖက်ဝတွင် ရပ်နေသည်ကို မသိကြ။

“မညွန့်ရီ သုံးဆယ်၊ ဒေါ်ခွေး နှစ်ဆယ်၊ ဒေါ်ဒေါ်ညွန့် နှစ်ဆယ်၊ ရွှေယောက် သုံးဆယ်၊ ဦးပေါ်လာ နှစ်ဆယ်” စသည့် စာရင်းကို ကိုရွှေယောက်သည် ခဲတန်ဖြင့် တေးမှတ်နေ၏။
“ကိုရင်မောင့် ကိုယူတဲ့ မ်ိန်းမတော့ ကော်မှာနော်၊ မအေးသွယ်တို့တောင် ကိုရင်မောင့်ကို တရက်လောက် ယူပလိုက်ချင်လာဘီ၊ မိုးလင်းမှ အဆိပ် ခတ်သတ်ပစ်မယ်၊ ဒီကျောက်ဆင်းတုကြီးနဲ့ ကြာရှည်တော့ မပေါင်းနိုင်ပါဘူး” ဟု မအေးသွယ် ပြောသည်ကို အများက ဝိုင်း၍ရယ်နေသည်။
“ကိုရင်မောင် မရှိ်ရင် ကျုပ်တို့တော့ နောက်လူ အသစ်နဲ့ ပေါင်းရမှာ ရင်လေးပါတယ်တော်…၊ နောက်လူက ကုလားဆို၊ ကြက်သီးထလိုက်တာ၊ မစ္စတာ အေကော်နာတဲ့လား၊ ပိုက်ဆံ သိပ်တောင်းတဲ့လူဆို၊ ကျုပ်တို့ကို ဒီအတိုင်းတော့ ပစ်မသွားပါနဲ့ ကိုရင်မောင် နောက်လူနဲ့လဲ ဆက်ပေးခဲ့ပါအုံး၊ ထုံးစံအတိုင်းပေါ့”ဟု မညွန့်ရီသည် သူ့ ကိုယ်လုံး သေးသေးကွေးကွေးကြီးကို လှုပ်ယမ်းရယ်ကာ နောက်နေသည်။
“ဒါ ကိုရင်မောင့် အဖေအတွက် ကူတာနော်…ကိုရင်မောင့် အတွက် ကူတာလို့ မှတ်မသွားနဲ့အုံး”ဟု အတင်က ပြောနေသည်။

ကျနော်သည် သူတို့ ပြောဆို နေကြသည်ကိုလည်းကောင်း ရယ်မော နောက်ပြောင် နေကြသည်ကို လည်းကောင်း အာရုံမစိုက်ဘဲ သူတို့ နောက်ကျော၌ ရပ်နေသည့် ညိုညို့ ကိုသာ လှမ်းကြည့်နေသည်။
သူသည်လည်း အများကိုကျော်ပြီး ကျနော့်ကို ကြည့်နေသည်။ နေပူထဲမှ ဖြတ်သန်းလာခဲ့သောကြောင့်ထင်သည်။ သူ့ မျက်နှာကလေးမှာ နီမြန်းနေသည်။ သူသည် နဖူးမှ ချွေးများကို တဘက်ဖြင့် သုတ်နေ၏။
သူ ရောက်ပြီး အတန်ကြာမှ သူ့ ကို အားလုံး သတိထားလိုက်မိကြသည်။
ချက်ခြင်း ဂါတ်တွဲ တခုလုံးပေါ်တွင် ဆူသံညံသံများ တိတ်ဆိတ်သွားသည်။ တင်တင်သည် ကျနော့် အနားတွင် ထိုင်နေရာမှ ထလိုက်သည်။ လူအများစုသည် ညိုညို့ ကို မတွေ့ မြင်ဘူးသည့် သူစိမ်းတဦးလို ဝိုင်းကြည့်နေသည်။

ကိုိုရွှေယောက်သည် ငွေများကို ကျနော့် ဦးထုပ်အတွင်းသို့ ထည့်နေရင်း…
“ဘာလဲဟေ့ မိညို” ဟု ခပ်တိုးတိုး လှမ်းမေးနေသည်။

ညိုညိုသည် အတွင်းဖက်သို့ တိုးဝင်လာသည်။ ကျနော့် ရှေ့ နားအထိလျှောက်လာသည်။ ကျနော့် ရှေ့ တွင်ရပ်သည်။ သူ့ အိတ်ကပ်အတွင်းမှ နွမ်းကျေနေသော ငွေစက္ကူ ကျပ်တန် အလိပ်ကလေးကို ထုတ်သည်။ ကျနော့် ဦးထုပ် အတွင်းသို့ သူ့ လက်ဖြင့် ထည့်သည်။

“အစောက စာရင်းဖတ်နေသံ ကြားပါတယ်၊ ညိုညို နှစ်ဆယ့် နှစ်ကျပ်လို့ ရေးလိုက်အုံးနော်…”

သူက ကိုရွှေယောက်ကို လှမ်းပြောနေသံမှာ တုန်ယင်နေသည်။ ကိုရွှေယောက်သည် ကျနော့် ကို လှမ်း ကြည့်နေခဲ့၏။ ကျနော်က စာရင်းရေးရန် ခေါင်းညိတ်ပြမှ သူသည် နားရွက်ကြားမှ ခဲတန်ကို ထုတ်ယူပြီး စာရင်းတေးမှတ်လေသည်။
အားလုံးပြန်ဆင်းသွားကြသောအခါ ကျနော်သည် ညိုညို့ ကို ခဏနေခဲ့ရန် တားထားလိုက်သည်။
သူသည် ကျနော့် ရှေ့ ၌ ရပ်နေရစ်ခဲ့၏။ ကျနော်သည် စကားလုံးပေါင်း မြောက်မြားစွာ ပြောချင်နေသော်လည်း စကားစရှာမရ ဖြစ်နေပြန်သည်။ ထိုအခါတွင်မှ သူသည် ကျနော့် ကို အများနည်းတူ ငွေမပေးရသဖြင့် အားငယ်နေသည်ကို ကျနော်သည် သိလာရ၏။ ကျနော်သည် သူ့ ငွေစက္ကူလိပ်ကလေးကို ဦးထုပ်အတွင်းမှ ဆွဲယူပြီး လက်အတွင်း၌ ဆုပ်နယ်ထားမိသည်။
သူသည် ကျနော့် ကိုကြည့်ပြီး ခေါင်းကိုငုံ့ လိုက်သည်။

သူသည် ဤငွေကလေးများကို ရက်ပေါင်းများစွာ စုဆောင်းခဲ့ရခြင်း ဖြစ်သည်ကို ကျနော်တွေးနေမိသည်။
သူတို့ ဆန်မရှိသဖြင့် ထမင်းပင် ချက်မစားရသည့် အခါ၌လည်းကောင်း…. သူ့ အမေ ချောင်းဆိုးနေသည့်အခါ၌လည်းကောင်း ဤငွေကလေးများကို သူသည် မသုံးစွဲခဲ့။
ငွေကို ကျနော်သည် ပြန်၍မပေးရက် ဖြစ်နေရပြန်သည်။

“သူ ဘာပြောမလို့လဲ” ဟု သူက မေးနေသည်။

ကျနော်သည် သူ့ကို ပြောရန် စကားစမရှိဘဲ အတန်ကြာငြိမ်နေခဲ့မိသည်။

“မင်းငွေကို ကိုယူတယ်နော်…၊ အဲတာ ကျေးဇူးတင်တဲ့ အကြောင်း ပြောမလို့ပါ၊ ဒါပေမယ့် ဒီတခါဘဲ ယူမှာနော်…၊ ဒါ နောက်ဆုံး ဆိုတာလဲ ပြောချင်တယ်၊ ကိုယ်ပြောချင်တာတွေတော့ အများကြီးရှိတယ်၊ ခုတော့ ဘာပြောရမှန်းလဲ မသိတော့ဘူး၊ အချိန်လဲ မရှိတော့ဘူး၊ ဒီလိုလုပ်လေ… အပြန်ကျရင် ညောင်တိုထွက်ရင် ဂါတ်တွဲကို မင်းလာခဲ့အုံး၊ အဖော်တယောက်လဲ ခေါ်ခဲ့နော်၊ တော်ကြာ လူအထင်သေးနေရင်လဲမကောင်းဘူး၊ အဲဒီကျမှ အေးအေးဆေးဆေး ပြောမယ်၊ ခု အဖော်တွေရှိတုန်း သွားတော့၊ ဒီမှာ နှစ်ယောက်ထဲ နေတာ အထင်သေးနေကြအုံးမယ်”

သူ ဘူတာရုံသို့ ရောက်သွားသည်အထိ နောက်ကျောဖက်မှ ငေးကြည့်နေမိသည်။
ကျနော်သည် သက်ပြင်းချခဲ့မိ၏။
သူ့ ငွေကိုပြန်ပေး၍လည်း မဖြစ်၊ ယူလည်း ယူ မထားရက်။ သူ ပျောက်ကွယ်သွားသည်အထိ ဘာလုပ်ရမှန်း တွေးမရဖြစ်နေခဲ့သည်။ သူ ပေးသည့် ငွေကလေးများကို အလိပ်မပျက် အမှတ်တရသိမ်းထားရန် ဆုံးဖြတ်နေမိသည်။
နောက်ဆုံးတွင် ကျနော်သည် သူ့ ကို တခုခုပြန်ပေးရန်တွေးမိမှ ရင်ထဲတွင် ပေါ့ပါးကြည်လင်သွားသည်။
ထိုနေ့က ကျောက်ပန်းတောင်းမှ ရထားကြီး ပြန်ထွက်လာခဲ့လျှင် ကျနော့် လက်ထဲတွင် သူ့ အတွက် အကျီင်္ပိတ်စတခုနှင့် ထမီတထည် ပါလာခဲ့သည်။ ဤပစ္စည်းများကို သူမယူလျှင်လည်း သူ့ မျက်မှောက်၌ လွှင့်ပစ်ခဲ့ရန် ဆုံးဖြတ်လာသည်။
အပြန်၌ ညောင်တိုမှ ရထားကြီး ထွက်လာခဲ့လျှင် သူနှင့် သူ့ အဖော် သင်းသင်းသည် ဂါတ်တွဲပေါ်သို့ တက်ရောက်လာကြ၏။
သင်းသင်းသည် သူနှင့် ကျနော် လွတ်လပ်စွာ စကားပြောခွင့်ရစေရန် ဂါတ်တွဲရှေ့ ဖက် ဝရံတာတွင် တယောက်တည်း ရပ်နေခဲ့သည်။
အလယ် ဂါတ်ဗိုလ် အခန်းကျဉ်းကလေးထဲ၌ ဂါတ်ဗိုလ် ကိုထွန်းအောင်သည် အသေအမျော အိပ်ပျော်လာခဲ့၏။
သူသည် ဝရံတာ မှီရင်း ခေါင်းငုံ့နေ၏။ ကျနော်သည် လက်ထဲ၌ အထည်များထည့်သည့် စက္ကူအိတ်ကိုဆုပ်ကိုင်ထားရင်း မည်သို့ စပြောရမည်ကို မသိ။

အတန်ကြာမှ “ပြောစရာရှိတယ်ဆို” ဟု သူ သည် ခပ်တိုးတိုး စတင်မေးမြန်းသည်။
ကျနော်သည် ဘာမျှ မပြောဘဲ သူ့ လက်အတွင်းသို့ စက္ကူအိတ်ကိုထည့်လိုက်သည်။သူသည် စက္ကူအိတ်ကိုငုံ့ကြည့်လိုက်ပြီး ကျနော့် ကို အတင်းပြန်ပေးနေသည်။

“မယူဘူး…မယူဘူး… သူများ မ်ိန်းမပျက် မဟုတ်ဘူး” ဟု ငြင်းဆန်နေရင်း မျက်ရည်များ ဝိုင်းလာသည်။
အသား တဆတ်ဆတ် တုန်လာသည်။ မျက်နှာကလေး မဲလာသည်။
ထိုအချိန်၌ နေရောင်ကို တိမ်တတိုက်သည်လည်း ဖြတ်သန်းနေကာ နေခြည်များလည်း မှေးမှိ်န်နေသည်။ အရိမ်မဲကြီးများ အတွင်း၌ ရထားသည် ဖြတ်သန်းနေ၏။
ကျနော်သည် မကြံစည်ဘဲလျက်နှင့် သူ့ တကိုယ်လုံးကို ရင်ခွင်အတွင်း၌ နှစ်မြှုပ် ပွေ့ဖက်ထားသည်။ သူ၏ အတွတ်တွတ်ငြင်းဆန်နေသံများသည် ကျနော့် ရင်ခွင်ထဲ၌ နစ်မြုပ် ပျောက်ကွယ်သွားနေသည်။ သူ့ မျက်ရည်များဖြင့် ကျနော့် ရင်အုံမှာ ရွှဲနစ်လာနေသည်။ ကျနော်သည် သူ့ ငိုသံ ငြင်းပယ်နေသံများ အကြား၌ သူ့ မျက်နှာကို ဆွဲမော့်လိုက်ပြီး အထပ်ထပ်နမ်းပစ်နေမိ၏။ သူ့ ကို ကျနော် မည်မျှ ချစ်ကြောင်း၊ တကယ့် မေတ္တာဖြင့် ညီမကလေးအရင်းကို ပေးသလို ပေးရကြောင်း၊ အစီအစဉ်မရှိလျှောက်ပြောနေမိ၏။
နောက်ဆုံး၌ သူ့ ကို ပေး၍ ရတော့မည်မဟုတ်ဟု သိလာရသည်။
သူသည် အထုပ်ကို လွှတ်ချထားသဖြင့်၊ ရထားလှုပ်ကာ ခုန်နေသဖြင့်၊ ကျ မကျန်ရစ်ခဲ့စေရန် ကျနော်သည် ခြေထောက်ဖြင့် ဖိနင်း ထားနေရသည်။
သူ့ ကို နည်းမျိုးစုံဖြင့် ရှင်းပြနေသည်ကို သူ ငြင်းဆန်မြဲငြင်းဆန် နေသဖြင့် ကျနော်သည်လည်း စိတ်၌ ထိခိုက်လာသည်။
ကျနော်သည် သူ့ ကိုဖြေလွှတ်လိုက်ပြီး အနည်းငယ် ဆတ်တွန်း တွန်းလိုက်၏။

“တော်ဘီ…မင်း ဘယ်တော့မှ ကိုယ့်မေတ္တာကို နားလယ်မှာ မဟုတ်ဘူး”
ကျနော်သည် အော်ဟစ် ပြောဆိုနေမိ၏။

အိတ်ကို ကောက်ယူလိုက်ပြီး အိတ်အတွင်းမှ အကျီင်္ပိတ်စကို ဆွဲထုတ်လိုက်သည်။ ကျနော့် လက်အတွင်း၌ အကျီင်္ပိတ်စသည် ပြန့်သွားပြီး အလံနီကြီးတခုကို လွှင့်လိုက်သလို ဖြစ်၏။ ကျနော်သည် ကြက်မောက်ဆည် ရေသွင်းမြောင်းတူးနေကြသော အမျိုးသမီးများကို ပိတ်စ လှမ်းမြောက်ပြကာ ဒေါသစိတ်ဖြင့် လွှင့်ပစ်ခဲ့သည်။
အကျီင်္ပိတ်စသည် လေစုတ်ယူသဖြင့် ရထားနောက်မှ အတန်ကြာ ဝေးဝေးအထိ လိုက်ပြေးလာနေသည်။ ရေသွင်းမြောင်း အလုပ်သမများသည် အော်ဟစ်ပြီး အုပ်စုလိုက် ရထားနောက်မှ ပြေုးလိုက်လာနေသည်။
အတော်ကြာလျှင် ပိတ်စကျရာ နေရာသို့ ရောက်လာကြ၏။ သူတို့ ဝိုင်း၍လုနေကြသည်ကို ညိုညိုသည် လှည့်ကြည့်နေ၏။
သူသည် နှုတ်ခမ်းကို ကိုက်ထားပြီး အလုပ်သမများကို ငေးကြည့်နေရင်း မျက်ရည်များ ဝဲလာနေသည်။

“မင်း ကို့ ကို အထင်သေးတာ ညိုညို၊ ကို့ ကို လက်ဆောင်ပေးပီး မ်ိန်းမသိုက်တူးနေတဲ့ သိုက်သမားလို့ မင်းထင်တာ၊ နောက် လူအုပ်နဲ့တွေ့ရင် ဒီထမိန်ပါ ပစ်ချခဲ့မယ်”

ကျနော်သည် ဒေါသဖြင့် အော်ပြောရင်း ထမီကို ဆွဲထုတ်လိုက်၏။
သူသည် ငိုရှိူက်နေရင်းမှ ကျနော့် လက်ကို ဖမ်းဆွဲထားသည်။

“မင်းကို ပိုက်ဆံပြန်ပေးရမယ်၊ မင်း ကို့ ကိုတော့ သူတောင်းစားပေးသလို ပေးသွားတာမှုတ်လား၊ ကို့ ကို အထင်သေးတာမှုတ်လား၊ ကဲ….ပြန်ယူလေ….ဒီပိုက်ဆံပြန်ယူ၊ ကိုက ဒီငွေကို ဘယ်တော့မှ မသုံးဘူးလို့ ဆုံးဖြတ်ထားတာ၊ ကို့ တသက်လုံး အမှတ်တရ သိမ်းသွားဘို့ ဆုံးဖြတ်ထားတာ”

သူသည် ကျနော် သူ့ငွေများ ပြန်ပေးနေသည့် လက်ကိုအတင်း ဖမ်းဆုပ်ထားသည်။
သူသည် ရုတ်တရက် ကျနော့် ရင်ခွင်အတွင်းသို့ ငိုရှိူက်ရင်း လှဲမှီလိုက်သည်။ ကျနော့်ခါးကို သူ့ လက်များနှင့် တင်းကျပ်စွာ ဖက်ထားရင်း သူ့ မျက်နှာဖြင့် ပွတ်တိုက်နေပြန်သည်။
အတန်ကြာလျင် ကျနော်သည် စကားမပြောတော့ဘဲ သူ့ လက်အတွင်းသို့ ထမီစက္ကူအိတ်ကိုထည့်ပေးလိုက်သည်။ သူသည် ခပ်ဖွဖွ ဆုပ်ကိုင်ထားနေသည်။ အတာစန်းကုန်းနားကပ်လာမှ သူသည် ကျနော့်ရင်ခွင်အတွင်းမှ ထွက်လိုက်ပြီး ဝရံတာကို မှီရပ်သည်။ မျက်ရည်များသုပ်လိုက်ပြီး ငေးနေပြန်သည်။

“သူ သွားမှာ..ဆယ့်ငါးရက်တောင် ကြာမှာနော်၊ အကြာကြီးဘဲ ↔

သူ၏ ခပ်တိုးတိုးပြောသံမှာ ရထားခုတ်မေါင်းသံ၊ သူ့ သက်ပြင်းချသံများနှင့် ရောထွေးပျောက်ကွယ်သွားနေသည်။
သူ ဆက်ပြောနေသည့် အခြားစကားများမှာ သူ့ အသံတိမ်ဝင်သွားနေသဖြင့် မကြားနိုင်တော့ပေ။ ။

နိုင်ဝင်းဆွေ

အပိုင်း (၉) သို့ ဆက်လက်ဖတ်ရှုပါရန်…..။



No comments:

Post a Comment