ဧရာဝတီ မဲခေါင် နိပါး ပေါ်က လွင့်မျောနေသော တိမ်တိုက်များ (၆)
လေယာဉ် ခရီးစဉ်နံပါတ်..၀၉၇၂။
SK ဘိုးရင်း ဂျက်လေယာဉ်ကြီးထဲ ကျနော် ဝင်လာတော့ လာအိုက လာခဲ့စဉ်တုန်းကလို ပြတင်းပေါက်ဘေးက ထိုင်ခုံတွင် ထိုင်ခွင့်ရပြန်သည်။ ထို့ကြောင့် ကျေနပ်သွားရ၏။ သို့သော် ဒွန်မောင်းလေဆိပ်၏ ပြင်ပ အနေအထားကိုမူ မြင်ခွင့် မရနိုင်ခဲ့ပါ။ မိမိ စီးနင်းလိုက်ပါရမည့် လေယာဉ်ကြီးကိုလည်း ကြည့်ခွင့် မရခဲ့ပါ။ ကျနော် စီးနင်းလိုက်ပါရမည့် လေယာဉ်က လေယာဉ်ပေါ်မတက်ခင် ခဏ ထိုင်စေါင့်ရသည့်အခန်းနှင့် တေ့ဆက်ပြီး နေရာယူလိုက်သောကြောင့် ဖြစ်သည်။ ထို့နောက် ခရီးသည်များ အားလုံး ဥမင်လှိုင်ခေါင်းလို(Tube) ကြီးထဲကတဆင့် လေယာဉ်ကြီးထဲ တန်းပြီး ဝင်ရောက်လာခဲ့ကြရ၏။ ထို့ကြောင့် ကျနော့်မှာ ဘေးပတ်ဝန်းကျင်ကို မြင်ခွင့်မရနိုင်တော့ပဲ လေယာဉ်ကြီးထဲ ရောက်လာခဲ့ရ၏။
ကျနော် လိုက်ပါရမည့် အခန်းတွင် ခရီးသည် ၁၀၀ ကျော်ခန့် ရှိမည်ဟု ခန့်မှန်းကြည့်မိသည်။ တစ်ဦးနှင့်တစ်ဦး စကားတွေ ဆူညံစွာ ပြောနေကြ၏။ လူတွေကလည်း ဟိုဒီ သွားလာရင်း ပစ္စည်းတွေ ထားကြ တင်ကြရင်း ရှုပ်ရှက်ခတ်နေသည်။
လူသွားလမ်းကလေးနှစ်ခုက အလယ်တွင် ခရီးသည်များ ထိုင်ခုံတန်းများကို ခွကာ မျဉ်းပြိုင် ရှိနေသည်။ ကျနော်က လက်ဆွဲပစ္စည်းများ ထည့်သိုရန် အကန့်ထဲ လက်ဆွဲသေတ္တာငယ်ကို သိမ်းထားလိုက်ပြီး ထိုင်ခုံဘေးက ပြတင်းပေါက် အဖုံးလေးကို ဆွဲမ လိုက်သည်။ အပြင်ဘက်ကို မြင်ရပြီ ဖြစ်သဖြင့် ကျေနပ်သွားရပြန်သည်။အပြင်ဘက် လေယာဉ်ကွင်းထဲတွင် မီးရောင် တလက်လက်နှင့် လေယာဉ်တချို့ ရပ်နားထားသည်ကို တွေ့ရသည်။ ဂရုတစိုက် လိုက်ကြည့်မည် ရှိစဉ် လေယာဉ်က စက်နှိုးပြီး လေယာဉ်ပြေး လမ်းပေါ် တက်လာနေပြီ ဖြစ်သည်။
လေယာဉ်မယ်တစ်ဦးက ခါးပါတ် ပတ်ထားကြရန် နှိုးဆော်သည်။ တချို့ခရီးသည်တွေကို လေယာဉ်မယ်က ဝိုင်းကူပြီး ခါးပတ် ပါတ်ပေးနေသည်။
ကျနော်က ပြတင်းပေါက်မှတဆင့် အပြင်ဘက်ကို မြင်နိုင်သမျှ မြင်အောင် အာရုံစိုက်ပြီး ကြည့်သည်။ ပြေးလမ်းမပေါ် အရှိန်အဟုန်မြှင့်ပြီး ပြေးနေသော လေယာဉ်ကြီးက ငြိမ့်ကနဲ တချက် မော့ကာ လေထဲသို့ တိုးဝင်လိုက်လေသည်။ အရှိန်ပြင်းပြင်းနှင့် ပြေးလာနေခဲ့သဖြင့် ရောင်စုံမီးများမှာ နောက်တွင် မျဉ်းကြောင်းများ ဆွဲထားသလို ကျန်ရစ်နေခဲ့ကြ၏။
တရိပ်ရိပ်နှင့် အမြင့်ကို တက်လာနေစဉ် အောက်ကို ကျနော် ငုံ့ကြည့်သည်။ မီးရောင်စုံ ထွန်းညှိထားသော ဘန်ကောက်မြို့ကြီးကို အမှောင်ထုကြီးထဲ လှမ်းမြင်နေရသည်။ အနက်ရောင် ကတ္တီပါစကြီးပေါ်တွင် တောက်ပသော ရောင်စုံကျောက်များ ကျဲပက်ထားသလို ဖြစ်နေသည်။ မည်သည့်လမ်း မည်သည့် အဆောက်အအုံကိုမျှ သဲသဲကွဲကွဲ မမြင်ရတော့။ ည သန်းခေါင်အချိန်မို့ ကောင်းကင်ကြီးသည်လည်း ပိန်းပိတ်အောင် မှောင်မည်းနေလေသည်။
ခန်းမကြီးရဲ့ထိပ် တီဗွီ ဖန်သားပြင်ပေါ်တွင် လေယာဉ် ခရီးစဉ် လမ်းကြောင်းပြ မြေပုံကို ဖေါ်ပြနေသည်။ လေယာဉ် စတင် ထွက်ခွါခဲ့ရာ ဒွန်မောင်းလေဆိပ်နှင့် လက်ရှိ လေယာဉ် ရောက်ရှိနေရာ အကွာအဝေး။ လက်ရှိ လေယာဉ် ဖြတ်ကျော် မောင်းနှင်နေသည့် ဒေသ။ လေယာဉ်ကြီး၏ အတွင်း အပြင် အပူချိန်နှင့် အမြင့်ပေတို့ကို ဖေါ်ပြပေးနေလေသည်။
ခဏအကြာတွင် ခရီးစဉ်ပြ လေယာဉ် လမ်းကြောင်းကလေးမှာ မျက်စေ့ရှေ့မှောက်မှာတင် မြန်မာပြည်ပေါ် ရောက်လာခဲ့သည်။ မော်လမြိုင်နှင့် ရန်ကုန်မြို့ကြားလောက်မှ ဖြတ်ကာ ရခိုင်ရိုးမနှင့် ချင်းတောင်တန်းများဆီ ဦးတည်နေလေသည်။
ကျနော်က ဖြစ်နိုင်လျင် အမှောင်ထုကြီးကို လက်ဖြင့် ဆွဲဖယ်ပစ်လိုက်ချင်သည်။ ကျနော့်အထင် လေယာဉ်ကြီးမှာ ဧရာဝတီ မြစ်ကြီးပေါ် ဖြတ်ကျော် သွားနေလောက်ပြီဟု တွေးသည်။ ဧရာဝတီဖြစ်ကြီးကို အမြင့်ပေါ်က ဆီးမိုးပြီး ကြည့်လို့ရသည့် မြင်ကွင်းကို တမ်းတမိသည်။ သို့သော် ဘယ်လိုမှ ကြည့်မြင်လို့ မရနိုင်ခဲ့ပါ။ ကျနော်က ဧရာဝတီဖြစ်ကြီးပေါ်က တိမ်တိုက်များကိုလည်း စိတ်ကူးနှင့် ပုံဖေါ်ကြည့်ပြန်သည်။ ကျနော်တို့ စီးနင်းလိုက်ပါလာသည့် လေယာဉ်ကြီး၏ အောက်တွင် တိမ်တိုက်များ ရှိနေသည်။ တိမ်တိုက်များ၏ အောက်တွင် ဧရာဝတီမြစ်ကြီးသည် အိပ်မောကျ နေပေလိမ့်မည်။ နှုတ်ဆက်လိုက်ပါတယ် အမိ ဧရာဝတီ…။
မိမိ တိုင်းပြည်နှင့် တရားဝင် ထိတွေ့သွားလာခွင့် ဆုံးရှုံးခဲ့ရသည်မှာ ၃ နှစ်ကျော် ကြာခဲ့ပြီမို့ ယခုလို ကိုယ့်တိုင်းပြည်ပေါ် ကျော်ပြီး လေယာဉ်စီးခွင့် ကြုံသည့်အခါ စိတ်လှုပ်ရှားမိသည်။ ပြီးတော့ လေယာဉ်ခရီးစဉ်ပြ လမ်းကြောင်းက ဟိမဝန္တာ တောင်တန်းကြီးကို ဖြတ်ကျော်တော့မည် ဖြစ်သဖြင့် ပိုပြီး စိတ်လှုပ်ရှားရပြန်သည်။
လေယာဉ်ကြီးသည် နိပေါနိုင်ငံနှင့် ရုရှနိုင်ငံ အနောက်တောင်ထောင့်ကို ဖြတ်ကာ ဥရောပသို့ ခတ်စွေစွေ ခတ်စေါင်းစေါင်း ထောင်တက် သွားနေလေသည်။
လေယာဉ်ကြီးပေါ်က အရေးပေါ် ဆင်းသက်နိုင်သည့် ထွက်ပေါက်ခလုပ်များ အသုံးပြုပုံ၊ ထိုင်ခုံအောက်တွင် ထားရှိသည့် အသက်ကယ် အကျီများ ဝတ်ဆင်နည်း၊ စသည်တို့ကို တီဗွီ ဖန်သားပြင်ကြီးပေါ်တွင် မကြခဏ ဆိုသလို ပြပေးနေသည်။ သို့သော် ကျနော်က သိတ်ပြီး စိတ်မဝင်စားလှပါ။ ပြောသမျှကိုလည်း လုံးစေ့ပတ်စေ့ နားမလည်ပါ။ တချို့ အတွေ့အကြုံ ရှိသူများက မှာလိုက်သည့် သီချင်းနားထောင်ရန် နားကြပ်ကလေးများ ဘယ်လို ရှာဖွေ တပ်ဆင် ရမည်ကိုလည်း ကျနော် မသိပါ။ လက်တွန်းလှည်းဖြင့် လိုက်ရောင်းနေသည့် အရက်ပုလင်းလေးများကိုလည်း သူများကို လက်ဆောင်ပေးရလျင် ကောင်းမည်ဟု တွေးမိသော်လည်း ကိုယ့်မှာ ပိုက်ဆံမပါသဖြင့် လှည့်၍ပင် မကြည့်ရဲခဲ့ပါ။ (လက်တွန်းလှည်းဖြင့် လိုက်လံရောင်းနေသည့် အရက်ပုလင်းငယ်များဟု ကျနော်ထင်ခဲ့သည်မှာ မှားနေသည်ကို နောင်ကျမှ ကျနော် သိရပါသည်။ အမှန်စင်စစ် ယင်း အရက်ပုလင်းကလေးများမှာ အရက်ကုမ္ပဏီများက ကြော်ညာသဘော အခမဲ့ လိုက်ပေးနေခြင်းသာ ဖြစ်သည်ဟု သိလာရပါသည်။) လေယာဉ်ပေါ်က ကျွေးသည့် အစားအစာကိုလည်း ဘယ်လို မှာစားရမည်ကို မသိသဖြင့် ပေးသမျှ ယူထားပြီး ဗိုက်ပြည့်အောင်သာ ဖြည့်လိုက်ရ၏။ ဒွန်မောင်း လေဆိပ်ထဲမှာ ကတည်းက ဆာလောင်လျက် ရှိသော ကျနော့်မှာ ဘာတွေ ညှပ်ထားမှန်းမသိသည့် ပေါင်မုန့်နှစ်ချပ်ကို စားပြီးနောက် အတော်လေး နေသာ ထိုင်သာ ရှိသွားရ၏။
ကျနော့်ဘေးတွင် အသက် ၅၀ ကျော်ခန့် ရှိမည် ထင်ရသော မည်သည့် လူမျိုးဟူ၍ တိတိကျကျ မသိနိုင်သည့် ခရီးသည် တစ်ဦး ရှိနေသည်။ သူသည် လေယာဉ်ထွက်ကတည်းက စကားတခွန်းမှ မပြောပဲ စာအုပ်တစ်အုပ်ကိုသာ သဲကြီးမဲကြီး ဖတ်လာလေသည်။ တခါတရံ ပါးစပ်က ဘာတွေ ရွတ်ဆိုနေမှန်းမသိ အသံထွက်ရုံကလေး ရွတ်ဆိုနေပြန်သည်။ ကျနော်က သူဖတ်နေသော စာအုပ်ကို မျက်လုံးတချက် ဝေ့ပြီး ကြည့်တော့ ဘာစာတွေမှန်းမသိ၊ အာရဗီစာတွေဟုတော့ ထင်မိသည်။ ထို ခရီသည်ကြီးမှာ အရှေ့အလယ်ပိုင်းက အာရပ်နွယ်ဖွါးတစ်ဦး ဖြစ်နိုင်ကောင်းရဲ့ဟု တွေးမိသည်။
လေယာဉ်ပေါ်က ခရီးသည်များမှာ သိတ်ပြီး ငြိမ်ငြိမ်သက်သက် မရှိလှပါ။ တခါတရံ စကားသံများ ဆူညံနေတတ်သေး၏။ အပေါ့အပါးသွားရာ လေယာဉ်နောက်ပိုင်းအနီးတွင် အရက်မူးနေသည့် မျက်နှာဖြူ ခရီးသည်တစ်ဦးကို လေယာဉ်မယ်တစ်ဦးက အကြာကြီး ဖြောင့်ဖျတွဲခေါ်ကာ ရှေ့ခန်းထဲ ဆွဲခေါ်သွားရ၏။ အသက် ၃ နှစ်ခန့်အရွယ် ခလေးတစ်ယောက်မှာမူ လူသွားလမ်းပေါ်တွင်ပင် ကန့်လန့်ဖြတ် လဲလျောင်းကာ နှစ်နှစ်ခြိုက်ခြိုက် အိပ်ပျော်နေလေသည်။
လေယာဉ် အတွင်းဘက်တွင်သာ အချိန် အတော်ကြာကြာ အာရုံရောက်နေရာမှ သတိရလို့ ပြတင်းပေါက်ကတဆင့် အပြင်ဖက်ကို ကြည့်တော့ ပတ်ဝန်းကျင် တစ်ခုလုံး ပိန်းပိတ်အောင် မှောင်နေလေသည်။ ကျနော် စီးလာသည့် လေယာဉ်ကြီးသည် ကမ္ဘာ့ အမှောင်ဘက်ခြမ်းကို ဖြတ်ကာ ဥရောပသို့ ဦးတည်ပြီး သွားနေလေသည်။
ငြိမ်းဝေ
ဆက်လက် ဖေါ်ပြပါမည်….။
No comments:
Post a Comment